سادىر جاپاروۆ. فوتو: akipress.org/

قىرعىزستان وسى كۇنگە دەيىن جۇرگىزگەن سىرتقى ساياساتىن جالعاستىرادى. پرەزيدەنتتىڭ مىندەتىن اتقارۋشى سادىر جاپاروۆ بريفينگتە وسىلاي دەپ مالىمدەدى.

جاپاروۆ سوزىندە: «رەسپۋبليكامىز قول قويعان بارلىق حالىقارالىق كەلىسىمدەر مەن مىندەتتەمەلەردى ورىندايمىز. رەسەي، قىتاي، ەۋروپا نەمەسە كورشى ەلدەر بولسىن، ارقايسىسىمەن بىرلەسكەن جۇمىسىمىزدى ودان ءارى جالعاستىرامىز. پرەزيدەنت مىندەتتەرى پارلامەنت سپيكەرىنە وتەدى، وسىدان كەيىن ول مەملەكەت باسشىسى قىزمەتىن اتقارادى. ال پرەمەر-مينيسترگە كەلەتىن بولساق، مينيسترلەر كابينەتىنىڭ جەتەكشىسى رەتىندە قىزمەتى پارلامەنتتىك سايلاۋ وتكەنشە ۋاقىتشا توقتاتىلادى. سول كەزگە دەيىن مىندەتىن ءبىرىنشى ورىنباسارى اتقارادى»، – دەيدى.

رەسمي مالىمەتتەر بويىنشا، قىرعىزستاننىڭ سىرتقى قارىزى 5 ميلليارد دوللارعا تاياعان. ەلدەگى داعدارىستىڭ الدىن الۋ ماقساتىندا قازاقستاننان قارجىلاي قولداۋ سۇراعان. بۇعان دەيىن قىرعىزستان ەۋروپالىق وداق پەن رەسەيدەن دە قولداۋ سۇراعان. بىراق سادىر جاپاروۆتىڭ «بيلىك مەنىڭ قولىما ءوتتى» دەگەن مالىمدەمەسىنەن كەيىن ماسكەۋ بىشكەككە بەرەمىن دەگەن 100 ميلليون دوللار كومەكتى توقتاتىپ تاستاعان.

15 قازاندا قىرعىزستاننىڭ پرەزيدەنتى سوورونباي جەەنبەكوۆ وتستاۆكاعا كەتكەنىن جاريا ەتتى. زاڭ بويىنشا ونىڭ وكىلەتتىلىگى جوعارى كەڭەش سپيكەرىنە وتۋگە ءتيىس. الايدا، سيپكەر وكىلەتتىلىكتەن باس تارتقاندىقتان پرەزيدەنتتىڭ قۇزىرەتتى بيلىگى جاقىندا عانا تۇرمەدەن شىققان سادىر جاپاروۆتىڭ قولىنا ءوتتى.

بۇل جاعدايعا حالىقارالىق ۇيىمدار الاڭداۋشىلىق بىلدىرگەن. ەۋروپالىق وداق وكىلدەرى قىرعىزستانداعى ساياسي جاعدايعا بايلانىستى مالىمدەمەسىندە، پرەزيدەنتتىڭ وكىلەتتىلىگى جاڭادان كەلگەن پرەمەر-مينيسترگە بەرىلگەنى كۇمان تۋعىزاتىنىن ايتقان. بۇۇ تارابى دا قىرعىزستانداعى ساياسي كۇشتەردى قۇقىقتىق نورمالاردى ساقتاۋعا شاقىرعان.

"The Qazaq Times"