كورنەكى سۋرەت. فوتو: cinemaplex

سەيسەنبى كۇنى قازاقستاندا 75 ادامنان كوروناۆيرۋس، 299 ادامنان كوروناۆيرۋس پنەۆمونياسى انىقتالعان. ەكەۋىن قوسقاندا 5 قازاقستاندىق  (U07.1 – 3, U07.2 – 2) قايتىس بولعان.

رەسپۋبليكا كولەمىندە COVID ەڭ كوپ ناۋقاس تىركەلگەن ايماقتار – شقو (22), ودان كەيىن استانا (16). دەنمين مالىمەتىنشە، بارلىعى 107 908 ادام اۋىرعان، ونىڭ 102 مىڭنان استامى ەمدەلگەن. بىراق دەرتتىڭ سەبەبىنەن 1731 ادام ومىردەن وتكەن.

بيىل جازدا «ماۋسىم-شىلدە قىرعىنىنا» جول بەرىپ العان ۇكىمەتتىڭ دەرەگىنشە، قازىرگى تاڭدا كوۆيد جۇقتىرعان 3 303 ادام (1 881 – اۋرۋحانادا، 1 422 – امبۋلاتورلىق باقىلاۋدا) ەمدەلىپ جاتىر. اراسىندا 56 ءجاسوسپىرىم-بالا بار. جاعدايى ناشارلاعان 90 ناۋقاستىڭ 14-ءىنىڭ احۋالى تىم اۋىر. 21 ناۋقاس وكپەنى جاساندى جەلدەتۋ اپپاراتىمەن تىنىستاپ جاتىر.

1 تامىزدان بەرى كوروناۆيرۋس پنەۆمونياسىنا شالدىققاندار 33 مىڭعا، 13 ناۋرىزدان بەرى بيلىك مويىنداعان COVID-19 ينفەكتسياسىن جۇقتىرعاندار قاتارى 108 مىڭعا جۋىقتاعان.

ددسۇ مالىمەتىنشە، قازاقستاندا اۋىرعانداردىڭ سانى 140 مىڭنان اسقان. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى.

پاندەميا باستالعالى جالپى جيىنى ۆيرۋس جۇققانداردىڭ 2660-ى (كۆي+ / U07.1 – 1 731, كۆي- / U07.2 – 353, ىلەسپە اۋرۋلاردان – 576) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەن 576 ادامدى جالپى ستاتيستيكاعا قوسىپ ەسەپتەمەيدى. ساراپشىلار بۇعان قارسى. ولاردىڭ ايتۋىنشا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان.

"The Qazaq Times"