جاھاندىق ىندەتكە اينالعان Covid-19 ۆيرۋسىن جۇقتىرعان ادامنىڭ ءيىس پەن ءدام سەزبەي قالاتىنى ءمالىم. بىراق، مۇنداي بەلگىلەر ساسىق تىماۋ كەزىندە دە بولادى. بۇل ەكەۋىن قالاي اجىراتۋعا بولادى. ەۋروپالىق مامانداردىڭ بۇل جايىنداعى زەرتتەۋ ناتيجەسىن Rhinology جۋرنالى جاريا ەتتى.

كوروناۆيرۋس جۇقتىرعان ادام ءيىس سەزۋ قابلەتىن جوعالتىپ الادى. بۇل كەزدە جۇعىمدالۋشىنىڭ مۇرنى ءبىتۋ نەمەسە تىنىس الۋدىڭ قيىنداۋى سىندى جاعداي بايقالمايدى. ال، بۇدان كەيىن ادامنىڭ تاماققا دەگەن تابەتى ناشارلاپ، ءدام سەزبەيتىن بولا باستايدى. زەرتتەۋشىلەر ۆيرۋس ادامنىڭ ءدام دانە ءيىس ايىراتىن نەرۆ كلەتكالارىنا تولىقتاي اسەر ەتەدى دەپ قارايدى.

عىلىمي زەرتتەۋدى شىعىس انگليا ۋنيۆەرسيتەتى عالىمدار توبىنىڭ جەتەكشىسى كارل فيلپوت جاساعان. ونىڭ زەرتتەۋىنە 30 ەرىكتى ( كوروناۆيرۋس جۇقتىرعان 10 ادام، ساسىقتىماۋ جۇقتىرعان 10 ادام جانە 10 قالىپتى ادام) قاتىسقان. ناتيجەدە ساسىق تىماۋدان گورى كوروناۆيرۋس جۇقتىرعان ادامنىڭ ءيىس جانە ءدام سەزۋ تۇيسىگى كوبىرەك السىرەيتىنى ءمالىم بولعان. كوروناۆيرۋس جۇقتىرۋشى اششى مەن ءتاتتىنى دە اجىراتا الماي قالادى. پروفەسسور فيلپوت بۇدان پايدالانىپ كوروناۆيرۋس جۇقتىرعانداردى انىقتاۋدىڭ تەز ءارى وڭاي ءتاسىلىن تابۋعا بولادى دەپ سانايدى.

ءۇي جاعدايىندا ليمون، كوفە، سارىمساق جانە تۇز بەن شەكەردەن پايدالانىپ تا ىندەتتى انىقتاۋعا بولادى. دەگەنمەن، عالىمدار مۇرىن جانە اۋىز قۋىسىنان سۇيىقتىق الىپ تەكستىلەۋدىڭ ماڭىزدىلىعىن باسا ايتادى.

جون حوپكينس ۋنيۆەرسيتەتىنىڭ عالىمدارى كوروناۆيرۋستىڭ ءيىس جانە ءدام سەزۋ تۇيسىكتەرىن قالاي السىرەتەتىنى تۋرالى ەڭ قونىمدى زەرتتەۋ ناتيجەسىن ۇسىندى. پروفەسسور، ەندريۋ لەين بۇل ءۇشىن مۇرىن قۋىسىنداعى جانە تىنىس جولىنداعى ۆيرۋستىڭ ارەكەتىن زەرتتەگەن. ناتيجەدە، تىنىس جولىنداعى ءيىس اجىراتۋعا جاۋاپ بەرەتىن زونادان اپف-2 فەرمەنتىن كوپ مولشەردە تاپقان. بۇل فەرمەنت اعزاداعى قاندايدا ءبىر رەاكتسيالاردى تەزدەتۋشى بيولوگيالىق كاتاليزاتور ءرولىن اتقارادى.

عالىمدار كوروناۆيرۋستىڭ ادام اعزاسىنداعى وسى فەرمەنتى وزىنە قىزمەت ەتكىزگەنىن، ناتيجەدە ۆيرۋستىڭ دەنەگە تەز تارالىپ، كوبىرەك زارداپ كەلتىرەتىنىن انىقتاعان. زەرتتەۋدەگى بۇل ءجاڭالىو كوروناۆيرۋسقا قارسى ەمدەۋ مەن الدىن الۋ ادىستەرىنە ۇلكەن ۇلەس قوسپاق.

"The  Qazaq  Times"