قر دەنساۋلىق ساقتاۋ ءمينيسترى الەكسەي تسوي كوروناۆيرۋستىڭ كۇزدە بولۋى مۇمكىن جاڭا تولقىنىنا دايىندىق تۋرالى مالىمدەدى. ونىڭ ايتۋىنشا، قازان ايىندا 13 جاڭا ءمودۋلدى جۇقپالى اۋرۋلار اۋرۋحاناسىنىڭ قۇرىلىسى اياقتالىپ، پايدالانۋعا بەرىلەدى. قازىر مەكەمەنى جابدىقتاۋعا ارنالعان قۇرال-قۇرىلعىلار ساتىپ الىنىپ جاتقان كورىنەدى.
«كوروناۆيرۋستىق پاندەميا اياقتالعان جوق (الدىڭعى جازبالارىنىڭ بىرىندە تامىزداعى احۋالدى «پوستپاندەميا» كەزىندەمىز دەپ سيپاتتاعان – QT). ءبىز قازان ايىندا جرۆي جانە تۇماۋ ماۋسىمىنا تۇسپا-تۇس كەلەتىن جاڭا تولقىنعا دايىن بولۋىمىز كەرەك. دەنساۋلىق ساقتاۋ مينيسترلىگى جەرگىلىكتى اتقارۋشى ورگاندارمەن بىرلەسىپ الداعى كۇزگى-قىسقى كەزەڭگە بەلسەندى دايىندالىپ جاتىر. ەلىمىزدىڭ ءدارىحانالارىنا 10 ميلليوننان استام ءدارى-دارمەك قاپتاماسى جەتكىزىلدى، بىرىڭعاي ديستريبيۋتور وپەراتورى مەديتسينالىق ۇيىمداردى اي سايىن ءدارى-دارمەكپەن قامتىپ كەلەدى. سونداي-اق، 30 قىركۇيەككە دەيىن 24 ملرد تەڭگە قارجىعا قوسىمشا ەكى ايلىق قور جەتكىزۋ جوسپارلانعان. سك-فارماتسيا جانىنان 11 ايماقتىڭ تۇراقتاندىرۋ قورلارىنىڭ نەگىزىندە رەسپۋبليكالىق تۇراقتاندىرۋ قورى قۇرىلدى»، – دەپ جازدى مينيستر Facebook پاراقشاسىندا.
الەكسەي تسوي ۇسىنعان دەرەككە سەنسەك، ەلدەگى اۋرۋحانالارعا 2578 دانا ءوججا قۇرىلعىسى ساتىپ الىنىپ جاتىر. سونىمەن قوسا، 23 890 توسەك-ورىن وتتەگى قورىمەن قامتىلماق. بۇعان دەمەۋشىلەر مەن دۇنيەجۇزىلىك بانك قارجىسى جۇمسالعان. بىراق ناقتى كولەمى ايتىلماعان. ەكى اپتادان بەرى جۋرنلايستەردىڭ الدىنا شىقپاعان تسوي قازان ايىنا دەيىن بارلىق اۋداندىق اۋرۋحانانى 100%-عا ساندىق رەنتگەن-اپپاراتىمەن قامتۋعا ۋادە بەردى. الايدا مينيستر ەل ابدەن زار بولعان قۇرىلعىلاردىڭ جالپى بيۋدجەتى قانشاعا شىققانى ناقتىلامادى.
مينيستر جاڭا تاعايىندالعان تۇسىندا (ماۋسىم-شىلدە) ورشىگەن ەپيدەميانى ەستە ساقتايتىنىن جازىپ، ول كەزدە قازاقستاننىڭ مەديتسينا سالاسى نوپىرلەگەن ناۋقاستى يگەرە الماعانىن مويىندادى.
ەرتەڭگى كۇنى وسى جاعداي قايتالانباس ءۇشىن ۆەدومستۆوارالىق كوميسسيا كوكتەمدە الماتى، شىمكەنت قالالارى مەن استانادا اشىلعان ءمودۋلدى اۋرۋحاناعا ۇقساس، جيىنى 2,7 مىڭ ورىنعا شاقتالعان تاعى 13 جۇقپالى اۋرۋحانا سالۋعا شەشىم شىعاردى. بۇلار اقمولا، الماتى، جامبىل، قاراعاندى، قىزىلوردا، سولتۇستىك قازاقستان، اتىراۋ، تۇركىستان، باتىس قازاقستان، قوستاناي، ماڭعىستاۋ، پاۆلودار وبلىستارىندا جانە الماتى قالاسىندا بوي كوتەرمەك.
شەنەۋنىكتىڭ سوزىنشە، وبلىس اكىمدىكتەرى جەر تەلىمدەرىن ءبولىپ قويعان. قازىرگى تاڭدا قۇرىلىسقا جاۋاپتى مەردىگەرلەردى تاڭداۋ ءراسىمى ءجۇرىپ جاتىر ەكەن. ال قارجىلاندىرۋ جاعى «جول كارتاسى جانە جۇمىسپەن قامتۋ كارتاسى» باعدارلاماسى مەن جەرگىلىكتى بيۋدجەت ەسەبىنەن جۇزەگە اسىرىلادى-مىس. ءار اۋرۋحانانىڭ قۇنىن وبلىس اكىمدىگى ءوز بەتىنشە انىقتايدى ءارى جەرگىلىكتى بيلىك «وسى اۋرۋحانالاردىڭ شتاتتىق كەستەسىن ۋاقتىلى قالىپتاستىرۋ بويىنشا» جۇمىس ىستەمەك.
ول «قابىلدانعان بارلىق شارالار پاندەميا كەزىندە مەديتسينالىق كومەكتىڭ قولجەتىمدىلىگى مەن ساپاسىن جاقسارتىپ، دارىگەرلەر مەن ناۋقاستاردىڭ قاۋىپسىزدىگىن قامتاماسىز ەتەرىنە» سەنىمدى.
ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ سەيسەنبىدە ۇكىمەت وتىرىسىندا 13 جاڭا ينفەكتسيالىق اۋرۋحانانىڭ قۇرىلىسى تۋرالى، ۆيتسە-ءمينيسترى سەرىك شاپكەنوۆ «جول كارتاسى» ەسەبىنەن بيىل سالىناتىنىن حابارلاعان. كوكتەمدە قولدانىلىسقا بەرىلگەن ءۇش مەگاپوليستەگى وسى تەكتەس اۋرۋحانانىڭ ارقايسىنا 5 ملرد-تان استام تەڭگە جۇمسالعان ء(ار پاتسيەنتكە 20-25 ملن تەڭگەدەن شىعادى). دەسە دە كۇرەڭ كۇزدە، ەپيدەميا ءورشيتىن ماۋسىم قارساڭىندا قولدانىسقا بەرۋ جوسپارلانعان جاڭا 13 اۋرۋحانانىڭ جالپى جانە جەكەلەي بيۋدجەتى بەلگىسىز.
ەڭ العاش قولدانىلىسقا بەلىرگەن ءمودۋلدى اۋرۋحانانىڭ ءبىرى ەلوردادا. 23 ءساۋىر 2020 جىل. فوتو: primeminister.kz
شەرزاتتىڭ ءولىمى ىسىنە قاتىستى قۇپيا ۆيدەونى جاريالاۋ كىمگە كەرەك بولدى؟ – ساراپشىلار مەديا سىنى
24 قازان – كىتاپحاناشىلار مەرەكەسى قۇتتى بولسىن!
«ۋچاسكەدەن ارۋاققا كوك حات»: الماتىدا مارقۇمعا كەلگەن شاقىرتۋ
كوميسسيا مەن باقىلاۋشى ەسەبىندەگى ايىرماشىلىق: الماتىدا رەفەرەندۋم قالاي ءوتىپ جاتىر؟
ء"ادىل قازاقستان، ەستيتىن مەملەكەت" ەندى ادۆوكاتتارعا قىسىم جاساي باستادى ما؟
«پسەۆدو-بايقاۋشى» الدە كاسىبي باقىلاۋشى: رەفەرەندۋمدى كىم باقىلايدى؟