ارمەنيا توتەنشە جاعدايدى تاعى ءبىر ايعا ۇزارتپاق. بۇل تۋرالى ەل ۆيتسە-پرەمەر تيگران اۆينيان حابارلادى.

ارمەنيانىڭ ۇكىمەت باسشىسى ەلدەگى ەپيدەميولوگيالىق جاعدايدى ءالى دە كۇردەلى دەپ ساناپ، حالىقتى بوساڭسىماۋعا شاقىرىپ وتىر. احۋال ناشارلاۋى مۇمكىن دەپ قاۋىپتەنىپ وتىرعان نيكول پاشينيان: «ەلدە سوڭعى ۋاقىتتا بايقالعان وڭ ديناميكا وزىمەن بىرگە جايسىز جاڭالىقتار دا اكەلدى. ازاماتتار كورسەتكىشتەردىڭ تومەندەۋىنەن ەپيدەمياعا قارسى ەرەجەلەردى ساقتاماي، تالاپتاردى بۇزا باستادى. كوپتەگەن ادامدار «كوروناۆيرۋستى جەڭدىك» دەپ تە ويلايدى. بىراق بۇل مۇلدەم ولاي ەمەس!»، – دەدى.

مالىمەتتەر بويىنشا، ارمەنيادا قاۋىپتى ۆيرۋستى جۇقتىرعاندار سانى 40 مىڭعا تاياپ، سوڭعى ءبىر تاۋلىكتە تاعى 166 ادام ىندەتكە شالدىققان. قازىر ەلدە 350 ادام اسا اۋىر حالدە جاتىر.

سوعان قاراماستان، توتەنشە جاعدايدا ەنگىزىلگەن بىرقاتار شەكتەۋدىڭ جاقىن ارادا الىنادى. تيگران اۆينياننىڭ مالىمدەۋىنشە، شەتەلدىك ازاماتتاردىڭ ەلگە كىرۋىنە رۇقسات ەتىلەدى. سونداي-اق بەلگىلى ءبىر تاۋارلاردىڭ ەكسپورتىنا بىرقاتار شەكتەۋلەر، ميتينگتەر جانە قوعامدىق ءىس-شارالار وتكىزۋ ماسەلەلەرى قايتا قارالماق. بۇل شەكتەۋلەردىڭ الىنۋى ەپيدەميولوگيالىق جاعدايعا، وڭ ديناميكانىڭ ساقتالۋىنا جانە بەلگىلەنگەن ەرەجەلەردى قالاي ساقتايتىنىمىزعا بايلانىستى.

"The Qazaq Times"