بەيرۋتتاعى جويقىن جارىلىستان كەيىن، نارازىلىق كۇشەيىپ، ەرەۋىلشىلەر مەن پوليتسيا اراسىندا قاقتىعىس بولدى.

بەيرۋتتاعى پورتتا بولعان جويقىن جارىلىستان 137 ادام قازا تاۋىپ، 5 مىڭنان استام ادام ءتۇرلى جاراقات الدى. ۇيىندىلەر استىندا قازا بولعاندار ءالى دە بولۋى مۇمكىن. سوڭعى ەكى جىلدان بەرى داعدارىستى باستان كەشىرىپ كەلە جاتقان ليۆان ءۇشىن سەيسەنبىدەگى جارىلىس جىعىلعان ۇستىنە جۇدىرىق بولىپ ءتيدى.

ەل بيلىگى ەكى اپتاعا توتەنشە جاعداي جاريالادى جانە قاتارىنان ءۇش كۇندى ازا تۇتۋ كۇنى ەتىپ بەلگىلەدى. الايدا، ەلدەگى داعدارىستان بيلىككە نارازى حالىقتى توقتاتا المادى. جارىلىسقا سەبەپ بولعان بەيرۋت پورتىندا 2013 جىلدان بەرى ساقتالىپ كەلە جاتقان 2750 توننا جارىلعىش زات بولعان. مالىمەتتەرگە قاراعاندا 7 جىلدان بەرى قاۋىپسىزدىك شارالارى ەسكەرۋسىز قالعان.

ەلدەگى نارازى توپ جارىلىستىڭ جەمقورلىققا بەلشەسىنەن باتىپ، ابدەن شىرىكتەسكەن بيلىكتىڭ سەلقوستىعىنان بولدى دەپ ەسەپتەيدى. جەرگىلىكتى اقپارات قۇرالدارى اپاتقا جاۋاپتى دەپ تابىلعان 16 ادامنىڭ قاماۋعا الىنعانىن العا تارتتى.

بەيرۋتتى استان-كەستەڭ ەتكەن امموني نيتراتى جانە اممياك سەليتراسى (NH4Nو3) سىندى جارىلعىشتار ليۆان ورتالىعىنا قالاي كەلگەن؟ 2013 جىلى 3 مىڭ تونناعا جۋىق جارىلعىش زاتتى تيەگەن كەمە بەيرۋت پورتىنا تەحنيكالىق اقاۋلارىنا بايلانىستى توقتاعان. Rhosus اتتى بۇل كەمەدە مولدوۆانىڭ بايراعى ىلىنگەن. انىعىندا بۇل كەمە، گرۋزيادان افريكاداعى موزامبيككە كەتىپ بارا جاتقان.

Rhosus تەحنيكالىق اقاۋلاردان كەيىن باسى داۋعا ءىلىنىپ، ءىسى سوتقا تۇسكەن جانە سودان قايتىپ قاۋىپتى زاتتى ول ارادان الىپ كەتپەگەن. پورت قويمالارىنا ساقتالعان قاۋىپتى جارىلعىش زاتتار 7 جىلعا جۋىق قاۋىپسىزدىك تالاپتارى ەسكەرۋسىز ساقتالعان. ۇكىمەتتىڭ سالعىرتتىعى قوسىلىپ، اقىر سوڭىندا ارىس وقيعاسىنا ۇقساس اپاتتى جاعداي بولعان.

"The Qazaq Times"