ليۆانداعى نارازىلىق قارۋلى قاقتىعىسقا ۇلاستى

ليۆان ورتالىعى بەيرۋت قالاسىنداعى ۇكىمەتكە قارسى نارازىلىق اكتسياسى اتىسقا ۇلاستى. 6 ادام قازا تاۋىپ، 30-دان استام ادام جاراقات الدى. قارۋلى قاقتىعىس شيت مۇسىلمان توپتارىنىڭ قارسىلىق شاراسى كەزىندە بولعانى ايتىلۋدا.

بىلتىر بەيرۋت پورتىنداعى جارىلىس، پاندەميا، ەلدەگى ۇزاق ۋاقىتقا سوزىلعان الەۋمەتتىك داعدارىس كوپتەن بەرى ۇكىمەتكە قارسى نارازىلىقتى كۇشەيتىپ كەلدى. ەل ازاماتتارى بۇعان دەيىن دە ۇكىمتتى كوررۋپتسيامەن ايىپتاپ بەيبىت نارازىلىق شارالارىندا وتكىزگەن.

بۇل جولى ەلدەگى «حيزبۋللا» جانە «امال» قاتارلى شيتتىك مۇسىلمان توپتاردىڭ نارازىلىعىندا وق اتىلىپ، سوڭى قارۋلى قاقتىعىسقا ۇلاسقان. اتالعان شيىتتىك توپتار بىلتىرعى جارىلىسقا قاتىستى سوتتىڭ شەشىمى مەن تەرگەۋ-تەكسەرۋ امالدارىنا نارازى. ليۆان سوتى جارىلىسقا ەلدەگى شيتتىك توپتاردىڭ دا قاتىسى بار دەگەن كۇدىكتەردى قاراستىرعان بولاتىن.

كەشەگى قاقتىعىسقا قاتىستى «حيزبۋللا» تارابى مالىمدەمە جاساپ، ليۆان قارۋلى كۇشتەرىندەگى حريستيان سنايپەرلەرى جينالعاندارعا قاراتا وق اتقانىن ايتتى. الايدا، ليۆان كۇشتەرى بۇل مالىمەتتى تەرىستەدى. دەگەنمەن، وسىنىڭ ءوزى قاقتىعىستىڭ سيپاتىن ءدىني الاۋىزدىققا قاراي بۇرىپ وتىر.

الەۋمەتتىك جەلىلەرگە تاراعان ۆيدەو جازبالار مەن سۋرەتتەردەن تاراپتاردىڭ كەزەكتەسە وق اتىسىپ، كوشە-كوشەلەردە جاۋاپتاسقان ۇرىس بولعانىن كورۋگە بولادى. سىرت ەلدىڭ ساراپشىلارى مەن وتاندىق بىرقاتار تاۋەلسىز ساراپشىلار دا بۇل جاعدايدىڭ ءسۇريا داعدارىسىنا الىپ كەلگەن قاقتىعىستارعا قاتتى ۇقسايتىنىن ايتۋدا. الداعى ۋاقىتتا ليۆاندا تۇراقسىزدىق ورناۋى مۇمكنى دەگەن بولجامدار دا جوق ەمەس.

The Qazaq Times