كورنەكى سۋرەت. قازاقستان ۇكىمەتى COVID-19 پاندەمياسى كەزىندە ستاتيستيكادا ەسەپسىز كەمشىلىك جىبەرىپ كەلەدى. فوتو: REGNUM اقپارات اگەنتتىگى

دەنساۋلىق ساقتاۋ مينيسترلىگى تامىز ايى باستالعالى بەرى زەرتحانادا راستالعان ناۋقاستاردان بولەك پتر سىناماسى تەرىس، بىراق كوروناۆيرۋسقا ۇقساس پنەۆمونياعا شالدىققانداردىڭ ستاتيستيكاسىن جاريالاي باستادى. دەگەنمەن قازاقستان ۇكىمەتى جارتى اي دايىندالعان جاڭا فورماتتاعى ستاتيستيكانىڭ كەم-كەتىگى كوپ. دەرەكتەر دەر كەزىندە سايكەسپەيدى نەمەسە جاڭارمايدى. تاعى... 

كوروناۆيرۋس (تەستىلەۋ ارقىلى زەرتحانادا ناقتىلانعان) بويىنشا دەرەكتەر:

  • 1 تامىز – 1226 (669 سيمپتومدى/557 سيمپتومسىز)
  • 2 تامىز – 1069 (570 سيمپتومدى/499 سيمپتومسىز)
  • 3 تامىز – 1158 (603 سيمپتومدى/555 سيمپتومسىز)
  • 4 تامىز – 1062 (569 سيمپتومدى/493 سيمپتومسىز)

كوروناۆيرۋستىق پنەۆمونيا (تەست تەرىس كورسەتكەنىمەن، – ۆيرۋس كلينيكاسى بار) بويىنشا دەرەكتەر:

  • 1 تامىز – 5181 ناۋقاس، 30 ءولىم
  • 2 تامىز – 789 ناۋقاس، 21 ءولىم
  • 3 تامىز – 276 ناۋقاس، 18 ءولىم
  • 4 تامىز – 1799 ناۋقاس، 17 ءولىم

جوعارىداعى مالىمەتكە قاراساق، قايشىلىعى مەن كەم-كەتىگى كوپ. سەبەبى جوسپاردان ءۇش كۇنگە كەشىگىپ وتكەن تامىزداعى العاشقى بريفينگتە، ياعني دۇيسەنبىدەگى جيىندا مينيستر الەكسەي تسوي ەلدە كوروناۆيرۋستىڭ كەسىرىنەن قايتىس بولعاندار سانىن 1058 بولعانىن ايتقان. ال كەيىنگى كۇنى ۇكىمەت وتىرىسىندا كورسەتكىش 1091-گە وسكەنىن مالىمدەدى. دەمەك ءبىر كۇندە، 3 تامىز كۇنى 33 ادام ومىردەن وتكەن. بىراق ۆەدومستۆو مەن مەملەكەتتىك كوميسسياگىڭ رەسمي رەسۋرسى www.coronavirus2020.kz  سايتىندا ەسكى دەرەك كۇيىندە. سوندىقتان دا حالىقارالىق اشىق دەرەككوزدەر 1058 ءولىمدى كورسەتىپ تۇر، ءالى جاڭارماعان. تاعى ءبىر ماسەلە، تامىزدىڭ 1-ءى 36 ادامنىڭ قايتقانى رەسمي تۇردە حابارلاندى، دەسە دە جەكسەنبى كۇنگى جاعداي بىزگە بەيمالىم. سول سەبەپتى ساراپشىلار مەن جۋرناليستەرگە تامىز ايىنداعى ءولىم ديناميكاسىن باعامداۋ-تالداۋ قيىنعا سوعىپ وتىر.

پاندەميا تۋرالى قازاقستانداعى باستى رەسۋرس - www.coronavirus2020.kz سايتى مينيستر مالىمدەمەسىنەن بىرنەشە كۇنگە كەشىگىپ جاڭارادى. فوتو: سايتتان سكرين

بۇگىن، 5 تامىزدىڭ ءتۇن جارىمىندا، ساعات 2:23-تە دەنساۋلىق ساقتاۋ مينيسترلىگىنىڭ اقپارات كوزدەرىندە وتكەن تاۋلىكتەگى كوروناۆيرۋس جانە سوعان ۇقساس پنەۆمونيا دەرەگى جاريالاندى. مينيسترلىكتىڭ مالىمەتىنشە, سەيسەنبىدە 276 ناۋقاس جانە 18 ءولىم تىركەلگەن. دەگەنمەن 3 تامىز كۇنگى دەرەك ءالى كۇنگە دەيىن بەلگىسىز. اراداعى ءبىر تاۋلىكتەگى جاعداي قالانباي قالعان قىشتىڭ كەتىك ورنىنداي حابارلانباۋى ۆەدومسۆتونىڭ اقپاراتتاندىرۋ قىزمەتىندەگى كوپ قاتەلىگىنىڭ ءبىرى عانا.

4 تامىز كۇنگى جاعداي بويىنشا رەسمي دەرەك. فوتو: قر دەنمين

«قر دەنساۋلىق ساقتاۋ مينيسترلىگى بۇدان بىلاي تاۋلىكتىك ناتيجەلەر تۋرالى اقپاراتتى كۇن سايىن ۇنەمى ۇزبەي جاريالاپ وتىرادى. بارلىق مالىمەت رەسمي سايتتا جانە ۆەدموستۆانىڭ الەۋمەتتىك جەلىلەردەگى پاراقشالارى ارقىلى تاراتىلادى. اتاپ ايتقاندا، ناۋقاستاردىڭ جالپى سانى جونىندە، قايتىس بولۋ دەرەكتەرى تۋرالى جانە دە قوعام ءۇشىن ماڭىزدى احۋالدىڭ بارلىعى رەسمي اقپارات تاراتۋ كوزدەرىندە جەدەل جاريالانىپ تۇرادى. ال، ايماقتارداعى احۋال تۋرالى اقپاراتتى اپتا سايىن دەنساۋلىق ساقتاۋ مينيسترلىگىنىڭ رەسمي وكىلى ارنايى بريفينگتە حابارلاپ تۇرادى»، – دەلىنگەن ۆەدومستۆو حابارلاماسىندا.

5 تامىز كۇنگى جاعداي بويىنشا رەسمي دەرەك. فوتو: قر دەنمين

سارسەنبى، بۇگىن ساعات 10:30 شاماسىندا دەنمين تاۋلىك اياقتالماي جاتىپ مالىمەت تاراتتى:

«2020 جىلعى 5 تامىزدا تىركەلگەن كوروناۆيرۋستىق ينفەكتسيا بەلگىلەرى بار پنەۆمونيا بويىنشا اقپارات

وتكەن تاۋلىكتە كوروناۆيرۋستىق ينفەكتسيا بەلگىلەرى بار پنەۆمونيانىڭ 1 799 جاعدايى جانە 17 ءولىم جاعدايى تىركەلدى.

1 تامىزدان بارلىعى: اۋىرعاندار – 8054, 86 ءولىم جاعدايى تىركەلدى».

رەسمي ستاتيستيكادا كوروناۆيرۋستىق پنەۆمونياعا شالدىققانداردىڭ سانى 8054-كە جەتكەنى جازىلعان. ەگەر كۇندەلىكتى جاريالانعان دەرەكتى، ياعني دۇيسەنبىدەگى «بەلگىسىز» مالىمەتسىز ەسەپتەسەك، 8045 كەيس شىعادى. سوندا دۇيسەنبى كۇنى نەبارى 9 ناۋقاس تىركەلگەن بولىپ شىعا ما؟ بۇل جاعى ءالى انىق ەمەس. جانە ءبىر نازار اۋداراتىن جايت، 5 تامىز كۇنگى جاعداي بويىنشا، كۆي وڭ شىققان، ياعني ينفەكتسيانىڭ كەسىرىنەن بارلىعى 1125 ءولىم دەپ كورسەتىلگەن. دەنساۋلىق ساقتاۋ مينيسترلىگى اتالعان ماسەلەلەرگە قانداي دا ءبىر تۇزەتۋ نە تولىقتىرۋعا نيەتتەنسە، رەداكتسيا جاريالاۋعا دايىن ەكەنىن ەسكەرتەدى.

سونداي-اق ايدىڭ العاشقى جانە كەيىنگى كۇندەرىندەگى دەرەكتە بايقالاتىن ايىرماشالىق ونداعان ەسە. كوروناۆيرۋستىق پنەۆمونيانىڭ از ۋاقىتتا ء(ۇش كۇندە) 18 ەسەگە كەمۋى كوپتىڭ كۇمانىن تۋعىزادى. 5181 پنەۆمونيا جاعدايىن اپتالىق جيىنتىق دەپ قاراستىرۋعا كەلمەيتىن سەبەبى ونىمەن جاپسارلاس بەرىلگەن ءولىم جاعدايى تاۋلىكتىك كورسەتكىش.

1 قاڭتار مەن 2 تامىز ارالىعىندا بىلتىرعىدان 3,3 ەسەگە ارتىق، ناقتىسى 256 مىڭنان استام پنەۆمونيا جاعدايى تىركەلگەن. الەۋمەتتىك جەلى قولدانۋشىلارى مەن ساراپشىلار كورسەتكىشتىڭ بىرنەشە كۇندە ايتارلىقتاي ازايۋىن مانيپۋلياتسيامەن بايلانىستىرادى.

قازاقستاندا زەرتحانادا راستالعان 95 مىڭعا جۋىق ادام (ونىڭ ىشىندە 8518 مەديتسينا قىزمەتكەرى – QT) ۆيرۋس جۇقتىرعان، ونىڭ 1091-ءى ينفەكتسيانىڭ تىكەلەي سەبەبىنەن، ال 319-ى جاناما اسەرىنەن قايتىس بولعان. تامىز باستالعالى بەرى كوروناۆيرۋستىق پنەۆمونياعا شالدىققانداردىڭ رەسمي ەسەبى 8 مىڭنىڭ ۇستىندە. ەكەۋىن قوسا ەسەپتەگەندە، 103 مىڭداي (102 936) ادام اۋىرعان، سونىمەن بىرگە ۆيرۋس جۇقتىرعان 1,5 مىڭنان استام (1125+319+86=1533– QT) ادام ومىردەن وتكەن. الايدا مۇنى ەڭ مينيمالدى ەسەپ دەۋگە بولادى. سەبەبى ماماندار مينيسترلىكتىڭ بيىل پنەۆمونيامەن اۋىرعانداردى قايتا قاراپ، ودان ۆيرۋستى اجىراتۋدى قيىنسىنعان 256 مىڭ كەيستىڭ اراسىندا كوۆيدتىڭ بارىن اكسيوما رەتىندە باعالاپ كەلەدى.

رەسمي ەسەپ 103 مىڭعا جۋىقتاعانىنا، مينيستر تسويدىڭ ەكى كۇندە بارلىق حالىقارالىق رەسۋرستارعا جاريالاۋعا ۋادە ەتكەنىنە قاراماستان، Worldometers, د.حوپكينس ۋنيۆەرسيتەتىنىڭ جانە ددسۇ سياقتى الەمدەگى نەگىزىگى دەرەكقورلاردا تەك زەرتحانادا ناقتىلانعان كوروناۆيرۋس جاعدايى عانا كورسەتىلگەن.

(اقپارات تولىقتىرىلدى)

   "The Qazaq Times"