پۋتين يادرولىق ارسەنالىن دايىندىققا قويعانىن ەسكەرتىپ كەلەدى. فوتو: Euronews

رەسەي ۋكراينادا دەگەنىنە جەتە الماسا يادرولىق قارۋىن پايدالانۋى مۇمكىن بە؟ بۇل قازىر اقش بارلاۋ قىزمەتىن ويلاندىراتىن باستى سۇراقتىڭ بىرىنە اينالدى. اقش بارلاۋ قىزمەتىنىڭ جوعارى جەتەكشىلەرى رەسەي ۋكراينادا «ۇمىتسىزدىككە تاپ بولسا» كرەمل يادرولىق ارسەنالىنىڭ ءبىر ءبولىمىن بوساتۋى مۇمكىن دەپ الاڭدايدى.

كەشە، اقش ورتالىق بارلاۋ اگەنتتىگىنىڭ (وبا/CIA/تسرۋ) ديرەكتورى ۋيليام بەرنس الەمدى الاڭداتقان وسى ماسەلە بويىنشا ءوز پىكىرىن ورتاعا سالدى. ول Georgia Tech ستۋدەنتتەرىمەن كەزدەسۋدەگى سوزىندە: «الەم رەسەي پرەزيدەنتى ۆلاديمير ءپۋتيندى تومەن باعالاماۋى كەرەك»، – دەگەن پىكىر ايتتى. بەرنستىڭ پىكىرىنشە، رەسەيدىڭ تاۋەكەلگە دەگەن «تابەتى» سىرتقى قىسىمدارعا دا بايلانىستى بولاتىنىن، «تاۋەكەل سەنىمى قىسقان سايىن كۇشەيە ءتۇسۋى» مۇمكىن.

سوعىس باستالعان شاقتا پۋتين ناتو ەلدەرىنە ەسكەرتۋ نەگىزىندە، سىرتقى تاراپتان اسكەري ارالاسۋ بولعان جاعدايدا يادرولىق قارۋدى قولدانۋعا بۇيىرارىن ايتتى. ال، بەيسەنبىدە ءپۋتيننىڭ ەڭ سەنىمدى كادرلارىنىڭ ءبىرى، ەكس-پرەزيدەنت دميتري مەدۆەدەۆ ەسكەرتۋ جاساپ، ەگەر شۆەتسيا مەن فينليانديا ناتو اليانسىنا قوسىلۋعا شەشىم قابىلداسا، رەسەي بالتىق جاعالاۋىندا يادرولىق وقتۇمسىقتاردى ورنالاستىرا باستايتىنىن ايتتى. مەدۆەدەۆ سوزىندە رەسەي كالينينگرادتا وقتۇمسىقتارىن ورنالاستىرۋى مۇمكىن ەكەنىن ايتتى. ول اتاعان كالينينگراد - بالتىق تەڭىزىندەگى رەسەي انكلاۆى، بەرليننەن ارا قاشىقتىعى 500 شاقىرىمعا جەتپەيدى، ال لوندون مەن پاريجدەن 1400 شاقىرىمنان از قاشىقتىقتا ورنالاسقان.

دەگەنمەن، ەۋروپالىق ەلدەر ءۇشىن بۇل جاڭالىق دەپ سانالماسى انىق. پولشاعا ءتيىپ تۇرعان انكلاۆتىڭ باستى ستراتەگيالىق ماقساتى نە ەكەنىن ۇدايى اڭدىسىپ وتىرعان ەلدەر جاقسى بىلەدى. دەسە دە بۇل ەۋروپاداعى قايشىلىقتى جاڭا دەڭگەيگە كوتەرۋى مۇمكىن.

CIA جەتەكشىسى سوزىندە ۆلاديمير پۋتين مەن وزگە رەسەيلىك جەتەكشىلەردىڭ بۇعان دەيىنگى قايشىلىقتار مەن اسكەري قاقتىعىستارداعى قىسىمعا قارسى ۇستانىمدارىن ەسكەرگەندە، قازىرگى جاعدايدا يادرولىق قاۋىپتىڭ جەڭىل دە بولسا مۇمكىندىكتەرى بار ەكەنىن ەسكەرتەدى. ونىڭ پىكىرلەرىنەن اڭعارعانىمىزداي، امەريكا قۇراما شتاتتارى رەسەيدەن تونەتىن يادرولىق قاۋىپتەن كورى،  ۆلاديمير پۋتين باستاعان كرەملدىڭ «رەسەيدىڭ ساياسي ىقپال ەتۋ اۋماعىن قالپىنا كەلتىرۋگە دايىنبىز» دەپ ويلاۋى جانە ونىڭ سالدارى كوبىرەك الاڭداتادى.

The Qazaq Times