فوتو: original.com

كوروناۆيرۋس سادارىنان الەمدە جۇمىسسىزدىق دەڭگەيى ەداۋىر ارتىپ، ءاربىر بەسىنشى مامان قىزمەتسىز قالعان. بۇل تۋرالى بۇۇ حابارلادى.

قازىر الەمدەگى ءاربىر بەسىنشى جاس جۇمىسسىز قالعان. پاندەميا جاستارعا ءبىلىم بەرۋ پروتسەسى مەن ماماندار دايارلاۋ جاعىن تۇرالاتتى. بۇۇ وكىلدەرى بارلىق مەملەكەت شۇعىل شارا قابىلداماسا، بۇل ماسەلە ونداعان جىلعا سوزىلىپ كەتۋى مۇمكىن دەيدى.

بۇۇ باس ەكونوميسى ەلليوت حارريس: «سوڭعى 20 جىل بويى بۇكىل الەم جاستارىنىڭ 20 پروتسەنتى جۇمىسسىز ءجۇر جانە كاسىپتىك-تەحنيكالىق ءبىلىم الماي كەلەدى. ول ازداي، كوروناۆيرۋس ءورشىپ، ەڭبەك نارىعىنداعى جاعدايدى ودان دا بەتەر ۋشىقتىرىپ جىبەردى. بىزدە 15 جىل ىشىندە جاستارعا 600 ميلليون جۇمىس ورىنىن قۇرۋ جوسپارى بولعان. پاندەميا باستالماي جاتىپ، ول تولىق ورىندالماي كەلگەن ەدى. ەندى قازىرگى جاعدايدا بۇل كورسەتكىشتەرگە جەتۋ قيىن بولارى ءسوزسىز»، – دەيدى.

مالىمەتتەر بويىنشا، داعدارىسقا دەيىن جاسى 29-عا كەلمەگەن 178 ميلليون ادام پاندەميادان ەڭ كوپ زارداپ شەككەن سەكتورلار – بولشەك ساۋدا مەن تۋريزم سالاسىندا ەڭبەك ەتكەن. بىراق ولاردىڭ 77%-ى زاڭسىز جۇمىس ىستەگەن.

"The Qazaq Times"