اقش پرەزيدەنتى دونالد ترامپ. فوتو: ۆۆس

سولتۇستىك كارولينا زەرتحاناسى سىناقتاردا قولدانىلاتىن ۆاكتسينا ءوندىرىسىن دۇيسەنبىدە باستادى.

ۆاكتسينا ازىرلەۋ جۇمىسىمەن تارىسقان پرەزيدەنت ترامپ قۇراما شتاتتار كوروناۆيرۋسقا قارسى ۆاكتسينانى ازىرلەۋدە «جاقسى جۇمىس ىستەپ جاتىر» دەپ مالىمدەدى.

ترامپ سولتۇستىك كارولينا، رولي قالاسىندا ورنالاسقان Fujifilm Diosynth كومپانياسىنىڭ يننوۆاتسيالىق ورتالىعىنا باردى. نىسان كۇزدە العاشقى كلينيكالىق زەرتتەۋلەرگە ارنالعان ۆاكتسينالاردى شىعارۋدى باستايدى. بۇل كلينيكالىق سىناققا شامامەن 30 000 ادام قاتىسپاق.

Fujifilm Dioxins كومپانياسى مەريلەند شتاتىنىڭ گايتەسبۋرگ قالاسىندا ورنالاسقان Novavax كومپانياسىنا ۆاكتسينالار شىعارادى. Novavax اقش ۇكىمەتىنىڭ كوروناۆيرۋستىق ۆاكتسينانىڭ دامۋىن تەزدەتۋ ماقساتىندا فەدەرالدى ۇكىمەتتەن 1,6 ميلليارد دوللارلىق تاپسىرىس الدى.

سونىمەن قاتار ترامپ اكىمشىلىگى Operation Warp Speed جوباسىن ىسكە قوستى. وسى جوبا اياسىندا بىرنەشە كومپانيا قاتار جۇمىس ىستەپ وتىر. كەلەسى جىلى قاڭتاردا 300 ميلليون دوزا قاۋىپسىز ءارى ءتيىمدى ۆاكتسينالار دايىنداۋدى ماقسات ەتكەن. سول ۋاقىتتا ۆيتسە-پرەزيدەنت مايك پەنس فلوريدا شتاتىنىڭ مايامي قالاسىنا باردى.

ۇلتتىق دەنساۋلىق ينستيتۋتى (NIH) مەن Moderna Inc بىرلەسىپ جاساعان تاعى ءبىر ۆاكتسيناعا كلينيكالىق سىناقتاردى باستادى. پەنس: «بۇل تاريحي كۇن، بۇل كۇنى ءبىز ۆاكتسينا ەگۋ جۇمىستارىن تولىعىمەن باستادىق»، - دەدى.

اقش-تا ۆيرۋس جۇقتىرعاندار سانى كۇن ساناپ ارتىپ كەلەدى. ترامپتىڭ ىندەتكە قارسى ارەكەتىنە سىن كوزبەن قارايتىندار دا كوپ. الايدا اق ءۇي ۆاكتسينانىڭ ءساتتى تابىلۋى بۇل سىنداردى جوققا شىعارادى دەپ ۇمىتتەنەدى.
بىراق دەنساۋلىق ساقتاۋ سالاسىنداعى ساراپشىلار قاۋىپسىز ءارى ءتيىمدى ۆاكتسينانى دايىنداۋ ءۇشىن بىرنەشە جىل قاجەت بولادى دەيدى.

اقش-تان باسقا تاعى بىرنەشە ەلدەر Covid-19 ۆاكتسيناسىن دايىنداۋعا تىرىسۋدا.

"The Qazaq Times"