يراننىڭ سوت بيلىگى اقش پرەزيدەنتى دونالد ترامپتى گەنەرال كاسەم سۇلەيمانيدى «ولتىرۋگە بۇيرىق بەرگەنى» ءۇشىن ينتەرپولدان حالىقارالىق ىزدەۋ جاريالاۋدى تالاپ ەتەدى. بۇل تۋرالى تەھران پروكۋرورى الي مەحر IRNA اگەنتتىگىنە حابارلادى.

«بۇل ىستە اقش-تىڭ 36 وكىلى، ونىڭ ىشىندە دونالد ترامپ، سونىمەن قاتار كاسەم سۇلەيمانيگە جاسالعان قاستاندىققا قاتىسقان باسقا دا مەملەكەت وكىلدەرى بار. رەسمي يران بۇل ادامداردى حالىقارالىق ىزدەۋ تىزىمىنە قوسۋدى تالاپ ەتەدى»، – دەدى پروكۋرور. ونىڭ ايتۋىنشا، «سۇلەيماني قازاسىنا قاتىسى بار ادامدار كىسى ءولتىرۋ جانە تەرروريستىك ارەكەتتەرى ءۇشىن ايىپتالۋى ءتيىس».

31 جەلتوقساندا اقش-تىڭ باعداتتاعى ەلشىلىگى الدىندا نارازىلىق شاراسى بولىپ، شەرۋشىلەردىڭ الدى ەلشىلىك عيماراتىنا شابۋىلداعان. امەريكا بۇل نارازىلىقتىڭ ارتىندا يران تۇر دەپ ەسەپتەيدى. نارازىلىق اقش كۇشتەرىنىڭ يراكتاعى جانە سۇرياداعى شابۋىلىندا شيت مۇسىلماندارى قازا تاپقانى تۋرالى مالىمەت تاراعان سوڭ تۇتانعان ەدى.

يسلام رەۆوليۋتسياسى ساقشىلار كورپۋسىنىڭ «قۇدس كۇشتەرى» ارنايى جاساعىنىڭ قولباسشىسى كاسەم سۇلەيماني 3 قاڭتاردا باعداتتاعى اقش-تىڭ اۋە شابۋىلى كەزىندە مەرت بولعان. ونى ولتىرۋگە اقش پرەزيدەنتى دونالد ترامپ بۇيرىق بەرگەن. «قۇدس كۇشتەرى» يراننىڭ سىرتتاعى اسكەري وپەراتسيالارىنا قاتىسقان. بۇعان دەيىن اقش-تان «كەك الاتىنىن» مالىمدەگەن يران 8 قاڭتاردا اقش-تىڭ يراكتاعى بىرقاتار نىساندارىن زىمىرانمەن اتقىلادى.

"The Qazaq Times"