Irannıñ sot biligi AQŞ prezidenti Donal'd Tramptı general Kasem Süleymanidi «öltiruge bwyrıq bergeni» üşin Interpoldan halıqaralıq izdeu jariyalaudı talap etedi. Bwl turalı Tehran prokurorı Ali Mehr IRNA agenttigine habarladı.

«Bwl iste AQŞ-tıñ 36 ökili, onıñ işinde Donal'd Tramp, sonımen qatar Kasem Süleymanige jasalğan qastandıqqa qatısqan basqa da memleket ökilderi bar. Resmi Iran bwl adamdardı halıqaralıq izdeu tizimine qosudı talap etedi», – dedi prokuror. Onıñ aytuınşa, «Süleymani qazasına qatısı bar adamdar kisi öltiru jäne terroristik äreketteri üşin ayıptaluı tiis».

31 jeltoqsanda AQŞ-tıñ Bağdattağı elşiligi aldında narazılıq şarası bolıp, şeruşilerdiñ aldı elşilik ğimaratına şabuıldağan. Amerika bwl narazılıqtıñ artında Iran twr dep esepteydi. Narazılıq AQŞ küşteriniñ Iraktağı jäne Süriyadağı şabuılında şiit mwsılmandarı qaza tapqanı turalı mälimet tarağan soñ twtanğan edi.

Islam revolyuciyası saqşılar korpusınıñ «Qwds küşteri» arnayı jasağınıñ qolbasşısı Kasem Süleymani 3 qañtarda Bağdattağı AQŞ-tıñ äue şabuılı kezinde mert bolğan. Onı öltiruge AQŞ prezidenti Donal'd Tramp bwyrıq bergen. «Qwds küşteri» Irannıñ sırttağı äskeri operaciyalarına qatısqan. Bwğan deyin AQŞ-tan «kek alatının» mälimdegen Iran 8 qañtarda AQŞ-tıñ Iraktağı birqatar nısandarın zımıranmen atqıladı.

"The Qazaq Times"