قىرعىزستان استاناسىندا ءسوز بوستاندىعىن شەكتەيتىن زاڭنىڭ قابىلدانۋىنا قارسى شەرۋ ءوتتى. جۇزدەگەن نارازىلىق بىلدىرۋشىلەر قالانىڭ تەمىرجول ۆوكزالىنان ۇلتتىق پارلامەنت پەن قىرعىزستان مەملەكەت باسشىسىنىڭ اكىمشىلىگى ورنالاسقان عيماراتقا دەيىن ءجۇرىپ وتكەن.

مارش بارىسىندا قاتىسۋشىلار «ەركىن ەلدە ءومىر سۇرگىمىز كەلەدى!»، «ەركىندىك!»، «گۇلشات، مانداتتى تاپسىر!» دەپ ۇرانداتتى. سوڭعى ۇران «اقپاراتتى مانيپۋلياتسيالاۋ تۋرالى» زاڭ جوباسىن قابىلداۋعا باستاماشى بولعان دەپۋتات گۇلشات اسىلباەۆاعا قاراتا ايتىلعان.

بۇل زاڭدى قىرعىزستان پارلامەنتى وتكەن اپتانىڭ ورتاسىندا قابىلدادى. زاڭ تالقىلاۋىنا ءباسپاسوز وكىلدەرى قاتىستىرىلمادى جانە تىكەلەي ەفيردە كورسەتىلمەدى. زاڭ شىعارۋشى ورگان اپپاراتى بۇعان بىرقاتار پارلامەنتشىلەردىڭ، سونىڭ ىشىندە وتىرىستاردىڭ ترانسلياتسياسىن ۇيىمداستىرۋعا جاۋاپتى ءباسپاسوز قىزمەتكەرلەرىنىڭ كوروناۆيرۋسقا شالدىعۋى سەبەپ دەپ ءتۇسىندىردى.

زاڭ الەۋمەتتىك جەلىلەردەگى قولدانۋشىلاردان جانە سايت يەلەرىنەن ولاردىڭ اتى-ءجونىن، ەلەكتروندىق پوشتا مەكەن-جايىن، «زاڭدىق ماڭىزى بار حابارلامالاردى جىبەرۋ» ءۇشىن مەكەن-جايىن كورسەتۋدى تالاپ ەتەدى. سونىمەن قاتار جالعان حابارلامالاردى جاريالاعان قولدانۋشىلاردى جاۋاپقا تارتۋدى قاراستىرادى. قىرعىزستاننىڭ باق وكىلدەرى مەن قۇقىق قورعاۋشىلارى بۇل زاڭنىڭ قابىلدانۋىن «رەسپۋبليكاداعى ءسوز بوستاندىعىنا شابۋىل» دەپ سانايدى.

«ءبىز ازات بوپ تۋدىق، ەشكىم ءبىزدى قۇلدىققا سالا المايدى. دەپۋتاتتار بىزگە توسقاۋىل بولا المايدى. ءبىزدىڭ ەلدىڭ 6 ميلليون تۇرعىنى بەس جىل بويى وسى دەپۋتاتتاردىڭ ارەكەتتەرىنەن زارداپ شەكتى»، – دەيدى شەرۋگە قاتىسۋشىلاردىڭ ءبىرى.

قىرعىزستان زاڭناماسىنا سايكەس، پارلامەنت زاڭدى قابىلداعاننان كەيىن قۇجاتقا ەل پرەزيدەنتى قول قويۋى كەرەك. شەرۋگە قاتىسۋشىلار مەملەكەت باسشىسىنان زاڭعا ۆەتو قويۋدى تالاپ ەتتى.

"The Qazaq Times"