اقش مەملەكەتتىك حاتشىسى مايك پومپەو كەزەكتى مالىمدەمەسىندە قىتاي ۇكىمەتىن ءوز ەلىندە جۇمىس ىستەيتىن شەتەلدىك باق-قا ادىلەتتىلىكپەن قاراۋعا شاقىردى.

اقش مەملەكەتتىك حاتشىسى بەيسەنبى كۇنى وتكەن ءباسپاسوز جيىنىندا اقش-تاعى قىتايلىق مەديا جۋرناليستەرىنىڭ سانىن قىسقارتۋ تۋرالى شەشىمدى جونىندە تۇسىنىك بەردى. «ءبىز وتكەن اپتادا اقش-تاعى قىتايدىڭ مەملەكەتتىك ۇگىت-ناسيحات اگەنتتىكتەرىنىڭ بەسەۋىندە قىزمەتكەر سانىنىڭ بەلگىلەنگەن شەكتەن اسىپ كەتكەنىن انىقتادىق. ءبىز بۇل ارەكەتتى پرەزيدەنت ترامپتىڭ قىتايمەن تەڭ قۇقىلى قارىم-قاتىناس ورناتۋ ميسسياسىن ورىنداۋ ءۇشىن جاسادىق»، – دەدى پومپەو.

پومپەو سونداي-اق، بەيجىڭگە قاراتا: «ءبىز بەيجىڭدى اقش-تاعى جانە ءوز ەلىندەگى شەتەلدىك باق-قا ادىلەتتىلىكپەن قارايتىن بولادى دەپ ۇمىتتەنەمىز. قىتاي كومپارتياسى تاۋەلسىز حالىقارالىق جۋرناليستەردىڭ قۇقىقتارىن شەكتەپ، قاتاڭ باقىلاۋ ورناتىپ، قىسىم كورسەتۋ نەمەسە قورقىتۋ شارالارىن ەنگىزىپ وتىر. ءبىز ءوزارا تۇسىنىستىككە قول جەتكىزۋ ءۇشىن ءوز شارامىزدى قولدانامىز»، – دەدى.

Reuters اگەنتتىگىنىڭ حابارلاۋىنشا، ترامپ اكىمشىلىگى وسى اپتادا ەلدەگى قىتايلىق اقپارات قۇرالدارىنىڭ سانىن شەكتەۋ تۋرالى شەشىم شىعاردى. بۇل ترامپ ۇكىمەتىنىڭ قىتايداعى تاۋەلسىز اقپارات قۇرالدارىنا قىسىم كورسەتۋ ارەكەتتەرىنە جاۋاپ رەتىندە جاسالعان. حاباردا ايتىلۋىنشا، قازىر قىتايداعى ءسوز بوستاندىعىنىڭ دەڭگەيى بۇدان ون جىل بۇرىنعىمەن سالىستىرعاندا الدە قايدا ناشارلاپ كەتكەن.

اقش مەملەكەتتىك حاتشىسى 5 ناۋرىزداعى مالىمدەمەسىندە: «تاۋەلسىز اقپارات قۇرالدارى جەمقورلىق ارەكەتتەردى اشكەرەلەپ، جۇرتشىلىقتىڭ اقيقاتتى اشۋىنا مۇمكىندىك بەرەدى. بۇدان بۇرىن ايتقانىمىزداي، اقپارات تسەنزۋراسى ولىمگە اكەلۋى مۇمكىن. ءبىز قىتاي كوممۋنيستىك پارتياسىن ءباسپاسوز بوستاندىعىن قۇرمەتتەۋ جونىندەگى مىندەتتەمەلەرىن تەز ارادا ورىنداۋعا شاقىرامىز»، – دەدى.

“The Qazaq Times”