قازاقستاندا ەندى Covid-19 پاندەمياسى تۋدىرعان ەپيدەميولوگيالىق احۋالدى باعالاۋدىڭ جاڭا كريتەريلەرى ەنگىزىلەدى. بۇل جايىندا دەنساۋلىق ساقتاۋ ۆيتسە-ءمينيسترى ءلاززات اقتاەۆا ۇكىمەت وتىرىسىندا مالىمدەدى.
جاڭا قوسىمشا بويىنشا ەلدەگى كارانتين رەجيمىن كۇشەيتۋ R كوەففيتسەنتى بويىنشا جانە ناۋقاستارعا ارنالعان ورىنداردىڭ بار-جوقتىعىنا قاراي انىقتالادى. وسىعان دەيىن ۇكىمەت كارانتين شارالارىن كۇشەيتۋ نە جۇمسارتۋ شەشىمدەرىن ەلدەگى ناۋقاستار سانىنىڭ ارتىپ-كەمۋىنە قاراي قابىلداپ كەلگەن.
R كوەففيتسەنتى ءبىر ناۋقاستىڭ ورتا ەسەپپەن قانشا ادامعا ۆيرۋس جۇقتىرۋى مۇمكىن ەكەندىگىن كورسەتەدى. ءلاززات اقتاەۆانىڭ ءسوزى بويىنشا "ەگەر R كورسەتكىشى 1,3-تەن اسسا نەمەسە ول 1,15 پەن 1,3 ارالىعىندا بولىپ، ينفەكتسيالىق ستاتسيونارلاردىڭ 70-تەن استامى بوس ەمەس بولسا، كارانتين شارالارىن كۇشەيتۋ كەرەك بولادى. نەمەسە ستاتسيونارداعى ورىنداردىڭ 90 پايىزى بوس ەمەس بولسا، R-عا قاراماستان كارانتين شارالارى كۇشەيتىلەدى". كارانتين شارالارىنىڭ جۇمسارۋى ءۇشىن ستاتسيونارلاردىڭ كەم دەگەندە 50% بوس بولۋى جانە R كوەففيتسەنتىنىڭ كورسەتكىشى 1-گە تەڭ بولۋى كەرەك. دەگەنمەن، Covid-19 ۆيرۋسىن جۇقتىرىپ،اۋرۋحاناعا تۇسكەن دەنساۋلىق ساقتاۋ ءمينيسترى ەلجان ءبىرتانوۆتىڭ مىندەتىن اتقارۋشى ءلازات اقتاەۆا ەلدەگى ستاتسيونارلاردىڭ ناۋقاس قابىلداۋعا قانشالىقتى قاۋقارلى ەكەنى جانە R كورسەتكىشى جايىندا اقپارات بەرمەدى.
وسى اپتادا دەنساۋلىق ساقتاۋ مينيسترلىگىنىڭ قىزمەتكەرلەرى استانا مەن الماتى قالالارىنداعى ينفەكتسيالىق ستاتسيونارلاردىڭ 90-95% بوس ەمەس دەپ مالىمدەگەن. سونىمەن قاتار اتالعان قالا تۇرعىندارى كورونوۆيرۋس ينفەكتسياسىنا تەست تاپسىرۋدىڭ دا قيىن ەكەنىن ايتىپ شاعىمدانعان.
استانا مەن الماتى قالالارىنداعى بلوك-بەكەتتەر الىنعاننان كەيىن ەلدە كوروناۆيرۋس جۇقتىرعانداردىڭ سانى كۇرت ءوستى. ال، دەنساۋلىق ساقتاۋ ءمينيسترى ەلجان ءبىرتانوۆ ۆيرۋس ءوزىنىڭ شىرقاۋ شەگىنە ءساۋىر ايىندا جەتەدى دەپ بولجاعان ەدى. ناۋقاستاردىڭ كوبەيۋىنە بايلانىستى ەلدەگى اۋرۋحانالار كەيبىر اۋرۋ بەلگىسى بار ادامداردى قابىلداي المايتىنىن جەتكىزگەن. جۋىردا دەنساۋلىق ساقتاۋ شەنەۋنىكتەرى تەك جاعدايى اۋىر ناۋقاستاردى عانا اۋرۋحاناعا جاتقىزاتىنىن مويىندادى.
ەلدەگى سوڭعى رەسمي اقپارات بويىنشا كوروناۆيرۋس جۇقتىرعانداردىڭ سانى 23 960 ادامعا جەتكەن، ونىڭ ىشىندە 7609 ادامنان ينفەكتسيا سيمپتومدارى بايقالماعان. ينفەكتسيادان قايتىس بولعاندار سانى 105 ادامعا جەتىپ وتىر.
استانادا قالعان جاڭاوزەندىك جۇمىسسىزدار "قازمۇنايگاز" كەلىسسوزدى توقتاتىپ تاستادى دەيدى
فبر پەنتاگوننىڭ قۇپيا قۇجاتتارىنىڭ جاريالانۋىنا قاتىسى بار كۇدىكتىنى قامادى
سۋديا قاڭتارشى–بيساەۆقا مەملەكەتتىك ادۆوكاتتىڭ كەڭەسىمەن تاعىلعان 272/2 بولىگىمەن ۇكىم شىعارا ما؟
ەكس-پرەزيدەنت نۇرسۇلتان نازارباەۆ اۋرۋحاناعا ءتۇستى
جابىرلەنۋشىلەر ۇتىك باسىپ ازاپتاعان ايدىن كەنجەباەۆقا كەشىرىم بەردى
قاڭتاردا تۋ كوتەرگەن بەرىك ابىشەۆ اۋرۋحانانىڭ جان ساقتاۋ بولىمىنە ءتۇستى