بۇگىن الماتى قالاسىندا دەمپارتيا مۇشەلەرى جاڭاوزەندەگى نارازىلىققا شىققاندارعا قولداۋ ءبىلدىرىپ الاڭعا شىقتى.

«جاڭاوزەندى قولدايمىز!»، «الماتى شىق! جاڭاوزەنمەن بىرگەمىز» دەپ ۇرانداتقان جانبولاتتىڭ جاقتاستارى اباي كوشەسىن بويلاپ ورتالىق الاڭعا بەت الدى.

دەمپارتيا جەتەكشىسى: «رەسپۋبليكا الاڭىنا شىقتىق. بۇكىل رەسپۋبليكا الاڭىن نازارباەۆتىڭ بيلىگى ۇرەيى قاشىپ، قورقىپ تۇگەلدەي جاۋىپ، قورشاپ تاستاپ وتىر. اۆتوكولىكتى ءتىپتى جاياۋ جۇرگىنشىلەردى دە جۇرگىزبەيدى.  ويتكەنى حالىقتىڭ ورىندى، ماڭعىستاۋلىقتاردىڭ تالابى دۇرىس. ولار ادىلدىك ءۇشىن، اقيقات ءۇشىن، شىندىق ءۇشىن الاڭعا شىعىپ جاتىر.  ءبىز جاڭاوزەندە تۇرعان اعايىنعا تولىق قولداۋىمىزدى بىلدىرەمىز. جاڭاوزەندەگى اعايىننىڭ كوتەرىپ وتىرعان ماسەلەسى دۇرىس، ورىندى دەپ سانايمىز. جانە بيلىك سولارمەن، حالىقپەن دۇرىس ديالوگ وتىرۋدى باستاۋى كەرەك! بۇگىننەن قالماي ەڭ كەمى پرەمەر مينيستر جاڭاوزەنگە بارۋى كەرەك! حالىقتىڭ تالابىن تىڭداۋى كەرەك. حالىقتىڭ ماسەلەسىنە قۇلاق اسۋى ءتيىس! ون جىل بۇرىنعىداي قاسىرەتتى وقيعا جاڭاوزەندە قايتالانباۋى ءتيىس! ەشقانداي حالىققا كۇش قولدانىلماسىن! حالىققا قارسى وق اتىلماسىن! جاڭاوزىندە حالىققا كۇش قولدانىپ، وق اتلسا بۇكىل قازاقستان شىعادى» دەدى.

2 قاڭتاردان باستاپ جاڭاوزەن قالاسىنىڭ تۇرعىندارى بىردەن ەكى ەسەگە ءوسىپ كەتكەن گازدىڭ باعاسىن 50 تەڭگەگە دەيىن تومەندەتۋدى تالاپ ەتىپ الاڭعا شىعىپ، كوشەلەردى جاۋىپ تاستاعان بولاتىن. ەلدىڭ ءار وڭىرلەرىندە جاڭاوزەندەگى نارازى حالىقتى قولدايتىندارىن ءبىلدىرىپ جاتقاندارىڭ سانى ءسات ساناپ ارتىپ كەلەدى. ال اشىق قولداۋعا الاڭعا شىققانداردى كۇشتىك قۇرلىمدار كۇشتەپ تارقاتىپ نەمەسە اپارىپ قاماپ جاتقانى ايتىلۋدا.