قازاقستاندا اقش اسكەري بازاسى سالىنا ما؟

قازاقستان پرەزيدەنتى قاسىم-جومارت توقاەۆ رەسەيلىك «كومسومولسكايا پراۆدا» گازەتىنە سۇحبات بەردى.

ءتىلشىنىڭ «قازاقستاندا اقش اسكەري بازاسىنىڭ سالىنۋى مۇمكىن بە؟» دەگەن ساۋالىنا توقاەۆ: «قازاقستاندا امەريكانىڭ اسكەري بازاسىن سالۋ تالقىلانىپ جاتقان جوق جانە بۇل ماسەلە كۇن تارتىبىندە تۇرعان جوق. سونىمەن بىرگە، قازاقستان مەن امەريكا قۇراما شتاتتارى اراسىنداعى ىنتىماقتاستىق ەنەرگەتيكا، ينۆەستيتسيا، تەحنولوگيا سياقتى ستراتەگيالىق سالالاردا تابىستى دامىپ كەلەدى. ءبىز قارۋسىزدانۋ جانە يادرولىق قارۋدى تاراتپاۋ ماسەلەلەرى بويىنشا ۇدايى بايلانىستامىز. وعان قوسا، ءبىز الماتىداعى بۇرىنعى وباعا قارسى ينستيتۋت بازاسىندا بيولوگيالىق قاۋىپسىزدىك سالاسى بويىنشا دا جۇمىس ىستەدىك. بىراق قازىر كەلىسىمشارتتىڭ اياقتالۋىنا بايلانىستى امەريكالىقتار زەرتحانادان كەتىپ، وندا تەك قازاقستاندىق ماماندار بيۋدجەت قاراجاتى ەسەبىنەن جۇمىس ىستەيدى. وسى سالاداعى زەرتتەۋلەردىڭ وزەكتىلىگىن ەسكەرە وتىرىپ، ءبىز رەسەيلىك ماماندارمەن دە تىعىز ىنتىماقتاستىق ورناتۋعا دايىنبىز»، – دەدى.

سونىمەن قاتار قازاقستاندا قىرىم نەمەسە دونباسس ستسەناريى قايتالانۋى مۇمكىن دەگەن بولجامعا پرەزيدەنت «جالعان ساراپشىلاردىڭ مۇنداي بولجام جاساۋىنا ەشقانداي نەگىز جوق. بالكىم، مۇنىڭ ءبارى قازاقستانداعى جاعدايدى تۇراقسىزداندىرۋعا جانە مەملەكەتتەرىمىز اراسىنداعى تاتۋ كورشىلىك، وداقتاستىق قاتىناستاردى بۇزۋعا باعىتتالعان بولۋى مۇمكىن. مۇنداي بولجامداردى تەك بىلىكسىز، وزگەلەردىڭ كولەڭكەسىنە جاسىرىناتىن ادامدار عانا ايتۋى مۇمكىن»، – دەپ جاۋاپ بەردى.

"The Qazaq Times"