وتكەن كۇنى ەلىمىزدە 356 ادامنان كوروناۆيرۋس تابىلىپ، تىركەلگەن كەيستەر سانى 10 مىڭعا تايادى.

كوروناۆيرۋس جۇقتىرعاندار سانى جاعىنان رەسپۋبليكادا الدىڭعى ورىنداردا تۇرعان الماتى قالاسىندا – 84, استانادا – 48 ادامعا ۆيرۋس جۇققان. باتىس قازاقستان وبلىسى، ماڭعىستاۋ وبلىسىندا ونداعان ادامنان كوروناۆيرۋس تابىلدى. دەنساۋلىق ساقتاۋ مينيسترلىگىنىڭ مالىمەتىنشە, تاۋلىكتىك ءوسىم 3,7% مولشەرىندە بايقالعان.

ەلدە بارلىعى 9932 ادامعا ۆيرۋس جۇققان:

  • الماتى قالاسى – 84 (بارلىعى 2462)
  • بقو – 51 (بارلىعى 544)
  • استانا – 48 (بارلىعى 1868)
  • ماڭعىستاۋ وبلىسى – 40 (بارلىعى 217)
  • قاراعاندى وبلىسى – 34 (بارلىعى 788)
  • شىمكەنت قالاسى – 32 (بارلىعى 762)
  • شقو – 23 (بارلىعى 97)
  • اتىراۋ وبلىسى – 21 (بارلىعى 980)
  • الماتى وبلىسى – 7 (بارلىعى 326)
  • قىزىلوردا وبلىسى – 6 (بارلىعى 330)
  • پاۆلودار وبلىسى – 5 (بارلىعى 197)
  • جامبىل وبلىسى – 3 (بارلىعى 365)
  • اقمولا وبلىسى – 2 (بارلىعى 151)

ۆەدومستۆونىڭ حابارلاۋىنشا، سقو، تۇركىستان، قوستاناي، اقتوبە  وبلىستارىندا جاڭا ناۋقاستار انىقتالماعان كورىنەدى. جالپى جيىنتىعى 9932 ادام COVID-19 ىندەتىنىڭ ينفەكتسياسىن جۇقتىرعان. ءبىر كۇندە 132 ادام جازىلعان. بارلىعى 4900 ادام ايىققان.

بۇگىنگى تاڭدا كوروناۆيرۋستىڭ كەسىرىنەن قايتىس بولعاندار قاتارى 37-گە جەتكەن. الايدا ىندەتتىڭ بار-جوعىنا بايلانىستى ەلدىڭ ءىشى ەكىگە جارىلعان. ۆيرۋستىڭ بارىنا سەنبەيتىن ازاماتتار دا از ەمەس. مۇنى كوبى دەنساۋلىق ساقتاۋ ءمينيسترىنىڭ باق وكىلدەرىنە كارانتين ايماعىنا جولاتپاۋ جونىندەگى «قاتە شەشىمى» مەن اقپاراتتاندىرۋدىڭ جەتكىلىكسىزدىگىمەن، سونداي-اق وڭىرلەر مەن مەگاپوليستەردەگى جەرگىلىكتى قوعامدىق دەنساۋلىق ساقتاۋ باسقارمالارىنىڭ جۇمىسىنداعى شيكىلىگىنەن دەپ سانايدى.

ساۋىردە دەنساۋلىق ساقتاۋ مينيسترلىگى شارىقتاۋ شەگىنە جەتتىك دەگەنىمەن، ءبىر اي وتپەي مىڭداعان كەيسكە وسكەن رەەسترگە بايلانىستى كەشە پرەزيدەنت توقاەۆ «شارىقتاۋ شەگىنەن وتتىك» دەپ مالىمدەدى. دەسە دە مەديتسينا سالاسىنىڭ ساراپشىلارى كاسىپكەرلەر مەن تۇرعىنداردىڭ كارانتين تالابىنا نەمقۇرايلى  قاراۋىنان الداعى ۋاقىتتا ماسەلە ۋشىعىپ، دەرت وشاعى ءورشىپ كەتۋى مۇمكىن ەكەنىن ايتىپ دابىل قاعۋدا.

"The Qazaq Times"