كورنەكى سۋرەت. فوتو: 123ru.net

جاڭا وقۋ جىلى باستالعالى بەرى قازاقستاندا 241 مۇعالىم مەن 1042 وقۋشىدان كوروناۆيرۋس انىقتالعان.

اۋىرعانداردىڭ اراسىندا 302 وقۋشى كەزەكشى سىنىپتاردا ءبىلىم العان. بۇگىن ورتكوم   بريفينگىندە دەنساۋلىق ساقتاۋ مينيسترلىگىنىڭ سانيتارلىق-ەپيدەميولوگيالىق قاداعالاۋ كوميتەتىنىڭ باستىعى ايجان ەسماعامبەتوۆانىڭ حابارلاۋىنشا، كوروناۆيرۋس جۇققان وقۋشى مەن مۇعالىم ەلدىڭ بارلىق ايماعىنان تابىلعان.

«1 قىركۇيەك پەن 16 قاراشا ارالىعىندا كەزەكشى سىنىپقا بارىپ جۇرگەن 302 وقۋشىدان كوروناۆيرۋس انىقتالدى. ءبىر بالادان ۆيرۋس پنەۆمونياسى تابىلدى. قازىر 456 بالا ەمدەلىپ جاتىر. وقۋ جىلىنىڭ باسىنان بەرى مەكتەپ قىزمەتكەرلەرىنىڭ اراسىندا 241 جاعداي تىركەلدى»، – دەدى كوميتەت جەتەكشىسى.

جاۋاپتى مامانداردىڭ سوزىنە سەنسەك، قازىر ءار جاعداي بويىنشا ەپيدەميولوگيالىق زەرتتەۋ جۇرگىزىلىپ، ۆيرۋس جۇققان اداممەن بايلانىستا بولعاندار انىقتالىپ جاتقان كورىنەدى.

پاندەميا سەبەبىنەن دۇنيەجۇزىلىك دەنساۋلىق ساقتاۋ سالاسىندا جاريالانعان توتەنشە جاعدايدىڭ سالدارىنان كوپتەگەن ەلدەر سياقتى قازاقستاندا دا وقۋشىلاردىڭ كوبى قاشىقتان ءبىلىم الىپ جاتىر. دەرتتىڭ تارالۋ قاۋپى تومەن وڭىرلەردە باستاۋىش سىنىپتار مەن سىيىمدىلىعى 300 وقۋشىعا دەيىنگى مەكتەپتەر ءداستۇرلى فورماتتا وقىتا باستاعان.

"The Qazaq Times"