دەنساۋلىق ساقتاۋ مينيسترلىگىنە قاراستى سانيتارلىق-ەپيدەميولوگيالىق باقىلاۋ كوميتەتى ءتورايىمى ايجان ەسماعامبەتوۆا جانە ورىنباسارى زاۋرە احمەتوۆا. فوتوكوللاج: قر وكق

كوميتەت ءتورايىمى مەن ورىنباسار نۇسقاسىنداعى كوروناۆيرۋسقا قايتا شالدىققاندار سانى ءبىر اپتادا بىردەن «جۇزدەگەن ەسەگە ارتتى».

مينيسترلىكتىڭ سانيتارلىق-ەپيدەميولوگيالىق باقىلاۋ كوميتەتى توراعاسىنىڭ ورىنباسارى زاۋرە احمەتوۆا بۇگىن ورتكوم الاڭىندا وتكەن بريفينگتە قازاقستاندا 800 شاقتى ادام كوروناۆيرۋستى قايتا جۇقتىرعانىن مالىمدەدى.

«زەرتتەۋ ماتەريالى مەن ستاتيستيكالىق مالىمەتتەرگە سايكەس، 800-گە جۋىق ادام قايتا اۋىرعان سىرقات رەتىندە تىركەلگەن. بىراق بۇل جاعدايدىڭ ارقايسىسىن ەپيدەميولوگتار مەن سالا ماماندارى ءجىتى  زەرتتەپ، كونسيليۋم جۇرگىزەتىن بولادى»، – دەدى احمەتوۆا.

ول كەيىننەن تولىق اقپارات بەرۋگە ۋادە ەتتى.

ءبىر قىزىعى، وسىعان دەيىن ءدال وسى توردە ءساۋىردىڭ 14-ءى كۇنى بريفينگتە احمەتوۆانىڭ باستىعى، كوميتەت ءتورايىمى ايجان ەسماعامبەتوۆا مۇنداي دەرتكە شالدىققاندار نەبارى ەكەۋ دەپ ەدى.

ەسماعامبەتوۆا «ازىرگە رەسمي تىركەلگەن ەكى جاعداي بار. دەگەنمەن جاڭا شتامداردىڭ تارالۋى سەبەپتى قايتا جۇقتىرۋ ىقتيمالدىعى جوعارى ەكەنىن ايتقىم كەلەدى. سوندىقتان ەمدەۋ حاتتاماسىنا قايتا سىرقاتتانۋ تۋرالى تۇسىنىك ەنگىزىلىپ، وعان جاتاتىن جاعدايلار ناقتىلاندى» دەگەن.

مينيسترلىك مالىمەتىنشە، قايتا سىرقاتتانعان العاشقى جاعداي قاراعاندى وبلىسىندا بىلتىر قازان ايىندا تىركەلگەن. قاراشا ايىندا بقو دەنساۋلىق ساقتاۋ باسقارماسى باسشىسىنىڭ ورىنباسارى گۇلنار ابدراحمانوۆانىڭ كوروناۆيرۋس جۇقتىرعان ناۋقاستىڭ ارادا بىرنەشە اي وتكەن سوڭ قايتا اۋىرعانى جونىندەگى مالىمدەمەسىن ۆيتسە-مينيستر اجار عينيات مەن كوميتەت جەتەكشىسى ايجان ەسماعامبەتوۆا تەرىستەگەن ەدى.

قازاقستاننىڭ دەنساۋلىق ساقتاۋ سالاسىندا ستاتسيتيكا ەڭ باسى داۋلى ماسەلە. پاندەميا تۇسىنداعى نەگىزگى ەسەپ كوروناۆيرۋس ستاتيستيكاسىنىڭ ءوزى ساراپشى-ماماندار مەن اقپارات قۇرالدارىنىڭ ەسكەرتۋ-سىنى بويىنشا ۇزدىكسىز جەتىلدىرىلىپ كەلەدى. QT رەداكتسياسىنىڭ ۇندەۋىمەن بىرقاتار كەمشىلىكتەر تولىقتىرىلعان.

“The Qazaq Times”