ءاليا نازارباەۆا كارانتين كەزىندە كىتابىنىڭ تۇساۋكەسەر-تويىن وتكىزدى

قازاقستاندا 30 جىل بيلىكتە بولعان نۇرسۇلتان نازارباەۆتىڭ كەنجە قىزى ءاليا نازارباەۆا «مەستو سيلى» دەگەن العاشقى كىتابىن باسىپ شىعاردى. كىتاپ تۇساۋكەسەرى بىرنەشە ايدان بەرى ەپيداحۋال وڭالماي «قىزىل ايماقتا» تۇرعان الماتى قالاسىنداعى اباي اتىنداعى قازاق مەملەكەتتىك اكادەميالىق وپەرا جانە بالەت تەاترىندا مەرەكەلىك كەش تۇرىندە ءوتتى. كەلگەن قوناقتىڭ كوپشىلىگى بەتپەردە رەجيمىن ساقتاماعان. نازارباەۆا توي-كونتسەرت فورماتىندا وتكەن جيىن «سانيتارلىق تالاپتارعا ساي ءوتتى» دەگەن پىكىردە. 

كىتابىنا بايلانىستى جاريالاعان جازباسىندا اۆتور «تۇساۋكەسەر الماتىدا، گاتوب-تا (اباي اتىنداعى قازاق مەملەكەتتىك اكادەميالىق وپەرا جانە بالەت تەاترى اتاۋىنىڭ ورىسشا قىسقارتىلعان اتاۋى – QT)  وتتى. مۇندا 30%-عا دەيىن تولتىرۋعا بولادى جانە Ashyq جۇيەسى جۇمىس ىستەيدى» دەگەن ءۋاج كەلتىرەدى.

«كەش قوناقتارى كىتاپتىڭ يدەياسى مەن ماقساتى، ءبىزدىڭ كوماندانىڭ قازىرگى جانە جوسپارلانعان جوبالارى تۋرالى ءبىلدى،  «سازگەن سازى» قازاق حالىق اسپاپتار وركەسترىنىڭ شاعىن كونتسەرتىن تىڭدادى. ءدال وسى ءسات كەرەمەت بولدى، جاندى اۋەن ءبارىن ەلىكتىردى» دەيدى.

كەشكە قوناق رەتىندە شاقىرىلعان تانىمال تۇلعالار Instagram الەۋمەتتىك جەلىسىنە كەش بارىسىنان ءتۇرلى بەينە-فوتو ماتەريالدار جۇكتەدى. رەسەيلىك بەلگىلى شوۋمەن ماكسيم گالكين جۇرگىزگەن كەشتە رەسمي تانىستىرىلىمنان كەيىن ءان-ساۋىق قۇرعانى، بيلەگەنىن كورۋگە بولادى. كەڭ داستارحان باسىنداعى قوناقتار ەش بەتپەردەسىز تىعىز جايعاسقان. ىعى-جىعى جۇرگەن جۇرتتىڭ كوبى كىل ىعاي مەن سىعاي.

قوناقتار اراسىندا ءار سالادا بەلگىلى ازاماتتار: اقان ساتاەۆ، ءادىل احمەت، الميرا تۇرسىن، سانجار ءمادي، بەيبىت قۇسايىنوۆ، جانسايا ابدۋلماليك، نارگيز قۇساين، نۇرلان-ايگەرىم قويانباەۆتار، ارمانجان بايتاسوۆ، ءسابيت راحىمباەۆ، ءداۋىت شايحىيسلاموۆ، دانا ورمانباەۆا ت.ب. كورىندى. تويعا بارعان سىيلى قوناقتار جاريالاعان ۆيدەولاردا داياشىدان وزگەسى بەتپەردە تاقپاعانىن اڭعارۋعا بولادى.

جەلىدە تاراعان ءتۇرلى ينستاستوريس جازبالاردا ءاليا نازارباەۆانىڭ قوناقتارعا قاراتا «وسىنداي ۋاقىتتا، كارانتين، كوۆيد كەزدە سىزدەر سوندا دا قورىقپاي قولداۋ بىلدىرۋگە كەلگەندەرىڭىزگە راقمەت، كەش سىزدەرگە ۇنايدى دەپ ۇمىتتەنەمىن» دەگەن.

رەداكتسيا ءتىلشىسى الماتى قالاسىنىڭ سانيتاريالىق-ەپيدەميولوگيالىق باقىلاۋ دەپارتامەنتىنەن وقيعا تۋرالى پىكىر سۇرادى. بىراق جاۋاپتى ماماندار قانداي دا ءبىر اقپارات بەرە قويمادى. باس سانيتار دارىگەر جانداربەك بەكشينمەن بايلانىسۋ مۇمكىن بولمادى، قوڭىراۋ شالعانىمىزدا الدەبىر سەبەپپەن تۇتقانى بىرنەشە رەت ءوشىرىپ تاستادى. سوڭعى مارتە حابارلاسقانىمىزدا دۇرىس ەستىلمەي تۇرعانىن ايتىپ، ءسوزىن قىسقا قايىردى. ادەتتە قوعامدىق تاماقتانۋ ورىندارى مەن رەستورانداردا كوپشىلىكتىڭ جينالماۋىن قۇرامىنا بىرنەشە قۇزىرلى مەكەمەنىڭ ماماندارى كىرەتىن مونيتورينگ توپتارى تەكسەرىپ-قاداعالايدى. نازارباەۆانىڭ اۆتورلىعى جانە  ۇيىمداستىرۋىمەن وتكەن مەرەكەلىك كەشتىڭ زاڭدىلىعى مەن سانيتارلىق تالاپتاردىڭ ساقتالۋى تۋرالى سۇراقتىڭ باسى اشىق قالدى. وسى ۋاقىتقا دەيىن قالالىق جەرگىلىكتى اتقارۋشى بيلىك وكىلدەرى ءتۇرلى فورماتتا وتكەن مەرەكەلىك شارالارعا قاتىسقان بەلگىلى تۇلعالار مەن ۇيىمداستىرۋشىلاردى كارانتين ەرەجەسىن بۇزعانى ءۇشىن اكىمشىلىك جاۋاپقا تارتىپ، ايىپپۇلعا كەسكەن.

ءاليا نازارباەۆا جەلىدەگى جازباسىندا ءىس-شارانىڭ  ماقساتى «پۋبليتسيستيكالىق دەبيۋتىنىڭ» جاي تانىستىرۋ عانا ەمەس، «جاسىل اۋماقتى» دامىتۋعا ارنالعان قايىرىمدىلىق اۋكتسيونىن وتكىزە وتىرىپ كوپتىڭ نازارىن قورشاعان ورتا ماسەلەسىنە اۋدارۋ بولعانىن جازادى. ونىڭ جوسپارىنشا، ءباسساۋدا مەن كىتاپ ساتىلىمىنان تۇسكەن قارجىعا قازاقستان وڭىرلەرى مەن استانا ماڭىنداعى ورمانعا اعاش وتىرعىزىلىپ، كوگالداندىرىلماق.

ەكوماسەلەلەر تۋرالى ءجيى ءسوز قوزعايتىن ءاليا نازارباەۆا «كۇش مەكەنى» (تۇپنۇسقا اتاۋى «مەستو سيلى») كىتابىنىڭ قازاقشا نۇسقاسى تاۋەلسىزدىك كۇنى قارساڭىندا جەلتوقسان ايىندا جارىق كورەتىنىن جەتكىزدى.

قالا ىندەتتىڭ ءتورتىنشى تولقىنىندا كوپتەگەن تۇرعىنىنان ايىرىلدى، مىڭداعان ادام اۋىرىپ، دەنساۋلىق ساقتاۋ جۇيەسىنە سالماق  ءتۇستى. ەپيدكارتادا بىرنەشە ايدان بەرى «قىزىل ايماقتا» تۇرعان الماتىدا پاندەميا باستالعالى 165 مىڭنان اسا ادام اۋىرعان، ونىڭ 10 مىڭعا جۋىعى قىركۇيەك ايىنىڭ العاشقى جارتىسىندا انىقتالعان. قازىر رەسپۋبليكادا انىقتالعان كۇندەلىكتى ەسەپتىڭ شيرەك بولىگى الماتى قالاسىنا تيەسىلى بولىپ وتىر.

ازاتتىق راديوسىنىڭ جاريالاعان اسا ىقپالدى «نازارباەۆ اۋلەتىن تۇگەندەسەك» دەپ اتالاتىن مۋلتيمەديالى ماتەريال بويىنشا، 41 جاساتاعى ءاليا نازارباەۆا 2018 جىلى ادەبيەت پەن ونەر سالاسى بويىنشا مەملەكەتتىك سىيلىق العان. قازاقستان پرەزيدەنتى اكىمشىلىگىندە جالپى ءبولىم كەڭەسشىسى بولعان. «Caspian Industries Ltd» (Vita مينەرالدى سۋى) كومپانياسىنىڭ باس ديرەكتورى، «الماتىفارم» كورپوراتسياسىنىڭ پرەزيدەنتى، «ەليتستروي» قۇرىلىس كومپانياسىنىڭ ديرەكتورلار كەڭەسىنىڭ ءتورايىمى، الماتىداعى «Wellness Club LUXOR» ساۋىقتىرۋ-سپورت كەشەنىنىڭ يەسى. 2011 جىلدان يتاليانىڭ Damiani زەرگەر ۇيىمەن ىنتىماقتاسىپ، Alsara دەگەن اتاۋمەن زەرگەر بۇيىمدارىن وندىرىسكە شىعارعان. 1998 جىلى قىرعىزستان پرەزيدەنتى اسقار اقاەۆتىڭ ۇلى ايدار اقاەۆقا تۇرمىسقا شىققان، كەيىن اجىراسىپ، 2001 جىلى بيزنەسمەن دانيار حاسەنوۆپەن تۇرمىس قۇرعان. كەيىن ونىمەن دە اجىراسىپ، «قازترانسويل» كومپانياسىنىڭ باس ديرەكتورى ديماش دوسانوۆپەن باس قوسقان. تيارا (2007), السارا (2011), ايلانا (2018) ەسىمدى ءۇش قىزى، الديار (2016) ەسىمدى ۇلى بار.

The Qazaq Times