قازاقستاندا كوروناۆيرۋس جۇقتىرعان ەكى ناۋقاس تىركەلدى

قازاقستاندا كوروناۆيرۋس ينفەكتسياسىنا شالدىققان العاشقى ەكى پاتسيەنت تىركەلدى.

دەنساۋلىق ساقتاۋ ءمينيسترىنىڭ سوزىنشە، الماتى قالاسىنا گەرمانيادان ۇشىپ كەلگەن ەكى قازاقستاندىق جۇقتىرعان.

«وكىنىشكە وراي، مەن بۇگىن مۇقيات تەكسەرۋدەن كەيىن ەكى ازاماتقا ينفەكتسيا وڭ ناتيجە كورسەتكەنىن راستاپ، حابارلاۋعا ءماجبۇرمىن. باسقا كارانتينگە جاتقىزىلعانداردا ازىرگە كلينيكالىق بەلگىلەر جوق، ءوزىن جاقسى سەزىنەدى. بارلىق قاجەتتى شارالار قولعا الىنىپ جاتىر»، - دەدى مينيستر.

12 ناۋرىز قونعان ۇشاقتاعى 12 ازامات اۋرۋحاناعا جاتقىزىلعان، ونىڭ بىرەۋىنەن كوروناۆيرۋس ينفەكتسياسى انىقتالدى. ال 9 ناۋرىز ۇشىپ كەلگەن بورتتاعى 73 جولاۋشىنىڭ بىرىنەن اتالعان ينفەكتسيا تابىلعان. ەكى ناۋقاسپەن بايلانىستا بولعان 85 ادامعا قاتىستى اقپارات انىقتالىپ جاتقان كورىنەدى.

ناۋقاس ەكى ادامنىڭ ءبىرى ەر ادام - 46 جاستا، ال ەكىنشىسى ايەل كىسى - 36 جاستا. ەكەۋى دە الماتى قالاسىنداعى جۇقپالى اۋرۋلار اۋرۋحاناسىنا جاتقىزىلدى،  سوندىقتان مەكەمە بۇگىننەن باستاپ كارانتين رەجيمىندە جۇمىس ىستەيدى.

11 ناۋرىزدا دۇنيەجۇزىلىك دەنساۋلىق ساقتاۋ ۇيىمى Covid-19 كوروناۆيرۋسىنا بايلانىستى پاندەميا جاريالادى. ددسۇ باسشىسى سوڭعى ەكى اپتادا قىتايدان باسقا ەلدەردە كوروناۆيرۋس جۇقتىرعان جانداردىڭ سانى 13 ەسە، ال، ۆيرۋس تىركەلگەن ەلدەر سانى 3 ەسە وسكەنىن حابارلادى.

(اقپارات تولىقتىرىلۋدا)

"The Qazaq Times"