اقش رەسەيلىك «روسنەفت»-كە ەنشىلەس كومپانيا TNK Trading International SA-عا سانكتسيالار ەنگىزدى. بۇل تۋرالى بەيسەنبىدە اقش قارجى مينيسترلىگى شەتەلدىك اكتيۆتەردى باقىلاۋ دەپارتامەنتى (OFAC) حابارلادى.

ۆەدومستۆو حابارلاماسىندا: «شەتەلدىك اكتيۆتەردى باسقارۋ كەڭسەسى بۇگىن TNK Trading International SA كومپانياسىنا ۆەنەسۋەلا ەكونوميكاسىنىڭ مۇناي سەكتورىنداعى وپەراتسيالارى ءۇشىن سانكتسيالار ەنگىزەدى. كومپانيا شۆەيتساريادا تىركەلگەن جانە» روسنەفت «مەملەكەتتىك كومپانياسىنىڭ ەنشىلەس كاسىپورنى»، — دەلىنگەن.

18 اقپاندا اقش اكىمشىلىگى ۆەنەسۋەلادان مۇناي ساتىلۋىنا بايلانىستى «روسنەفت TNK Trading International» جانە ونىڭ پرەزيدەنتى ديدە كاسيميروعا سانكتسيا ەنگىزەتىنىن حابارلادى. قارا تىزىمگە ىلىككەندەرگە اقش ازاماتتارى نەمەسە كومپانيالارىمەن بيزنەس جۇرگىزۋگە تىيىم سالىنادى.

ۆەنەسۋەلانىڭ PDVSA مەملەكەتتىك مۇناي كومپانياسى ونىمدەرى مەن ەسەپشوتتارىن رەسەيدىڭ «روسنەفت» كومپانياسىنا وتكىزگەندىگى ءمالىم بولدى. ال «جاسىرىن قىزمەتى» ءۇشىن رەسەي ۆەنەسۋەلادان كوپ كولەمدە قارجى العان. وسىعان بايلانىستى اقش ۇكىمەتى PDVSA كومپانياسىنىڭ مۇناي ونىمدەرىن ساتىپ الۋعا سانكتسيا ەنگىزگەن بولاتىن. سونىمەن قاتار ۆەنەسۋەلانىڭ ورتالىق بانكىنە دە سانكتسيا جاريالاپ، اقش دوللارىن الۋعا تىيىم سالىندى. دونالد ترامتىڭ ۇلتتىق قاۋىپسىزدىك بويىنشا كەڭەسشىسى دجون بولتوننىڭ ايتۋىنشا، بۇل ارەكەت – ەلدىڭ قازىرگى پرەزيدەنتى نيكولاس مادۋرونىڭ اسكەري قۋاتىن ارتتىرۋعا كومەكتەسىپ وتىرعان رەسەي مەن باسقا ەلدەرگە جاسالعان ەسكەرتۋ. كەڭەسشى ۆەنەسۋەلادا رەسەيلىك اسكەريلەردىڭ ءجۇرۋىن «ارانداتۋ» جانە «ەل قاۋىپسىزدىگىنە تونگەن قاتەر» دەپ اتادى.

وسىعان دەيىن ۆەنەسۋەلادا ورىن الىپ جاتقان داعدارىسقا توسقاۋىل بولۋ ءۇشىن رەسەي كاراكاسقا اسكەر جىبەرگەن بولاتىن. رەسمي ماسكەۋ «ديكتاتور» اتانعان ۆەنەسەۋلا پرەزيدەنتى نيكولاس مادۋروعا قولداۋ بلىدىرەتىنىن ايتتى.

«روسنەفت» — PDVSA مەملەكەتتىك كومپانياسىمەن بىرگە مۇناي بارلاۋ جانە ءوندىرۋ بويىنشا بىرنەشە جوبالاردى جۇزەگە اسىراتىن ۆەنەسۋەلاداعى ەڭ ءىرى شەتەلدىك ينۆەستورلاردىڭ ءبىرى. كومپانيالاردا سونداي-اق Perforosven مۇناي كاسىپشىلىگىندە سەرۆيستىك بىرلەسكەن كاسىپورنى بار.

"The Qazaq Times"