مينيستر ءبىرتانوۆ سانيتار بەكشيننىڭ بولجامىن راستادى

دەنساۋلىق ساقتاۋ ءمينيسترى ەلجان ءبىرتانوۆ كوروناۆيرۋس ينفەكتسياسىنىڭ تىركەلۋى جونىندەگى باس سانيتارلىق دارىگەر جانداربەك بەكشيننىڭ ايتقان بولجامىنا پىكىر ءبىلدىردى.

«كوروناۆيرۋس الەمدى جايلاپ بارادى، ينفەكتسيا 115 ەلگە تارادى. ولاردىڭ قاتارىندا جاقىن كورشىلەرىمىز، سونداي-اق، ەلىمىزبەن تىكەلەي اۋە قاتىناسى قالىپتاسقان مەملەكەتتەر دە بار. ءبىز دە الەمنىڭ ءبىر بولىگىمىز، سوندىقتان، وقشاۋلانىپ، بولەكتەنە المايمىز. مۇنى ءبارىڭىز جاقسى تۇسىنەسىزدەر. ينفەكتسيا قازاقستانعا دا جەتۋى مۇمكىن، ونى جوققا شىعارمايمىز»، – دەپ جازدى مينيستر Facebook جەلىسىندەگى رەسمي پاراعىنا.

ونىڭ سوزىنشە، ۇكىمەت كوروناۆيرۋس ينفەكتسياسىن ەلگە كىرگىزبەۋ مەن تاراتپاۋ باعىتىندا «بۇرىن-سوڭدى بولماعان اۋقىمدى شارالار قابىلداعان» كورىنەدى.

سونداي-اق ول «بۇگىندە قازاقستاندا كوروناۆيرۋس جۇقتىرعان ناۋقاس تىركەلگەن جوق!ال، باس سانيتارلىق دارىگەر بەكشين عالىمداردىڭ ستاتيستيكالىق مودەلدەۋ ادىسىمەن جاساعان بولجامىنا سۇيەنىپ، كوروناۆيرۋستىق ينفەكتسيا ەلىمىزگە دە جەتۋى مۇمكىن ەكەنىن ايتقان ەدى»، – دەيدى.

قازاقستاندا كوروناۆيرۋستىق ينفەكتسيا انىقتالماعانىن قايتالاعان ءبىرتانوۆتىڭ دەرەگىنشە، «عالىمدار زەرتتەۋ بارىسىندا سىرتتان كەلگەن جولاۋشىلار لەگى مەن كوروناۆيرۋس تاراعان مەملەكەتتەردەگى دەرەكتەردى پايدالانعان». …«بىراق وتاندىق عالىمداردىڭ بولجامى ءىس جۇزىندە بولماۋى دا مۇمكىن».

كەشە، 10 ناۋرىزدا ورتالىق كوممۋنيكاتسيالار قىزمەتىندە وتكەن بريفينگتە باس سانيتار دارىگەر جانداربەك بەكشين الداعى 5-6 كۇن ىشىندە ەلدە كوروناۆيرۋس دياگنوزى تىركەلۋى مۇمكىن ەكەنىن ايتقان ەدى.

“The Qazaq Times”