العىس ايتۋ كۇنگى الماتىداعى ۇستاۋلار (دەرەكتى فوتوبايان)

1 ناۋرىز ءتۇس كەزىندە پوليتسيا قورشاۋعا العان الماتىداعى رەسپۋبليكا الاڭى ماڭىندا ساقشىلار ونداعان ادامدى ۇستادى.

اپتا باسىنداعى استانالىق ازاماتتىق بەلسەندى دۋلات اعادىلدىڭ تۇرمە يزولياتورىندا جۇمباق جاعدايداعى ولىمىنەن كەيىن ەلدەگى بىرقاتار دەموكراتيالىق كۇشتەر مەن قازاقستاندا ەكسترەميستىك ۇيىم رەتىندە قىزمەتى شەكتەلگەن قدت ۇيىمى كوكتەمنىڭ العاشقى كۇنى جالپىحالىقتىق ميتينگىگە شىعۋعا شاقىرعان. كەشەلى بەرى الماتى قالاسى اكىمدىگىنىڭ اينالاسى تەمىر شارباقپەن تولىق قورشالىپ، ساقاداي ساي دايىندىق ءجۇرىپ جاتقان ەدى.

وقيعا ورنىندا رەداكتسيا تاپسىرماسىمەن جۇرگەن تىلشىلەردىڭ حابارلاۋىنشا، ساعات 14:00-گە دەيىن الاڭ اۋماعىنان 40-قا تارتا ازامات ۇستالىپتى. پوليتسيا جەلتوقسان مەن بۇرىنعى فۋرمانوۆ كوشەلەرىنەن ساتپاەۆ كوشەسىنە وتەر تۇستى بوگەپ، كولىك تۇگىلى جاياۋ جۇرگىنشىلەردى وتكىزبەي جاتىر. ميتينگ بەلگىلەنگەن جەرگە جەتپەي ۇستالعاندار دا بار. سونىڭ قاتارىندا ءوزىن ءجۋرناليسپىن دەپ تانىستىرعان اسەل جاڭاباي، «دات» گازەتتەر جوباسىنىڭ جەتەكشىسى، تانىمال جۋرناليست ەرمۇرات ءباپي پوليتسەيلەردىڭ نىساناسىنا ىلىكتى. ەكەۋىن دە ساقشىلار اۆتوزاكقا سالىپ اكەتتى.

الاڭعا وتە الماي جاتقان جاياۋ جۇرگىنشى. 1 ناۋرىز 2020 جىل. فوتو: QT

الاڭ اۋماعىندا جۋرناليستەردىڭ ءجۇرىپ-تۇرۋىنا قايتا-قايتا كەدەرگى كەلتىرىپ، ءارتۇرلى شەندىلەر تەكسەرىپ جاتتى.

Oyan, Qazaqstan ازاماتتىق قوزعالىسى ساعات 15:00-دە جاريالاعان دەرەك بويىنشا، المالى اۋدانىنىڭ پوليتسيا بولىمىنە 30-دان استام ۇيىم مۇشەلەرى جەتكىزىلگەن. ازىرگە انىقتالعان ءتىزىم:

ديلدا رامازان
اسەم جاپيشەۆا
باۋرجان سابيتوۆ
جانەل شاحانوۆا
ولجاس شاحانوۆ
مارجان ۋاليحان
سەيلجان گاليەۆ
اناستاسيا فيليپپوۆا
سىمبات وماركۋلوۆا
دانيار احمەتجانوۆ
ەربولات ايگاك
ديانا دۋيسەمباەۆا
ايجان بايتيمبەتوۆا
دينا باكراەۆا
اينا ساماتوۆا
دارحان شاريپوۆ
رۋستام كىپشاكباەۆ
ايزات ابيلسەيت
تامينا وسپانوۆا
ناگاشىبەك بەكداير
ەلميرا كويشىبەكوۆا
دينمۋحامماد بەكجان
فاريزا وسپان
دانا شاريپوۆا
ارينا وسينوۆسكايا
ازيزا ەسماگامبەتوۆا
ايدانا سىدىكبەكوۆا
ەدۋارد كاسىمجانوۆ

Vlast ينتەرنەت-جۋرنالىنىڭ قىزمەتكەرى رەجيسسيور دانيار احمەتجانوۆ (Adam Good) پەن قاسىنداعى وپەراتورىن تۇركىسىب اۋدانىنىڭ پوليتسيا دەپارتامەنتىنىڭ الىپ كەتكەنى بەلگىلى بولدى.

بۇعان دەيىن Amnesty International  حالىقارالىق قۇقىق قورعاۋ ۇيىمى 22 اقپان قازاقستان بيلىگىنىڭ كوپە-كورنەۋ ۇستاۋ ارەكەتى جايلى مالىمدەمە جاساپ, قازاقستانداعى ۇستاۋدى «ماسقارا»، «ۇيات» دەپ باعالادى. ءارى اكىمشىلىك جۇيەنى سەنبىدەگى بەيبىت ميتينگ كەزىندە قامالعان ازاماتتاردى دەرەۋ بوساتۋعا شاقىردى.

الاڭ اۋماعىندا ادەتتەگىدەي ازاماتتىق كيىم كيىنگەن قۇزىرلى ورگان قىزمەتكەرلەرى باقىلاپ ءجۇر. كوبىنە كوزىلدىرىك تاعىپ، باس كيىممەن جۇرەتىن ولار ۇنەمى راتسيا نەمەسە قۇلاققاپ ارقىلى اقپارات الماسىپ وتىرادى.

تاۋەلسىزدىك مونۋمەنتىنىڭ الدىنا جينالعانداردى اكىمدىكتىڭ ىشكى ساياسات ءبولىمىنىڭ ماماندارى مەن پوليتسەيلەر بىرنەشە مارتە تەكسەردى. 

ءوزىن كىم ەكەنىن تانىستىرمايتىن اكىمدىك وكىلى ءاردايىم باق وكىلدەرىنىڭ كۋالىكتەرىن سۇراتىپ، ءجيى تەكسەرۋدەن جالىققان ەمەس.

22 اقپان كۇنى وتكەن سانۋتسيالانباعان ميتينگتە اياعىندا پروتەزى بارىنا قاراماستان كۇشتەپ اكەتىلگەن 60 جاستاعى ايناش جورابەكوۆا:

– بىزگە مال سياقتى قارايدى. مۇگەدەكتەرگە تولەيتىن 40 مىڭ تەڭگە نەگە جەتەدى؟ مەنىڭ باستى تالابىم - مىنا بيلىك اۋىسسىن! كىم بولسا ول بولسىن، باستىسى، حالىق قامىن ويلايتىن، ەل مۇددەسىنە جۇمىس ىستەيتىن ادام كەلسىن. 3700 تەڭگە ايىپپۇل سالدى، ونى ءالى تولەگەم جوق، – دەيدى.

بۇگىن شاڭقاي تۇستە بەلسەندى ساۋلە ابىلداحانقىزىن ەكى كۇننەن بەرى اڭدىپ كەلگەن 452 ءنومىرلى قارا ءتۇستى مەرسەدەستەگى پوليتسەي ۇيىنەن شىققان بويدا سۇيرەلەپ الىپ كەتكەن.

ءوزىن ءجۋرناليستپىن دەپ اتاعان ازاماتتى كۇشتەپ اۆتوزاكقا سالىپ اكەتتى.

اينالانى ارنايى جاساق تورۋىلداپ تۇر.

فريلانسەر ءجۋرناليستى "سكانەرلەۋ" ساتىنەن.

ۇستاۋ ساتىنەن. 1 ناۋرىز 2020 جىل. الماتى. فوتو: QT

اۋداندىق اۆتوزاكتارداعى "اۋىستىرۋ" وپەراتسياسى كەزىندە "ويان، قازاق" دەپ ايعايلاعان بەلسەندىنى جابىلا ۇستاۋ كەزى.

جاياۋ جۇرگىنشىلەردىڭ الاڭ ارقىلى وتۋىنە ەشبىر قۇجاتسىز تىيىم سالىپ تۇرعان پوليتسەيلەر.

"دات" گازەتتەر جوباسىنىڭ باستىعى ەرمۇرات ءباپي ۇستالىپ وتىر دەلىنگەن اۆتوزاكتىڭ پوليتسەيلەرى ىشىندە "ەشكىمنىڭ جوق" ەكەنىن ايتسا دا، جۋرناليسكە قوڭىراۋ شالىپ وسى كولىكتە وتىرعانىنا كوز جەتكىزدىك.

اباي ەسكەرتكىشىنىڭ تۇبىندەگى باقىلاۋ.

“The Qazaq Times”