رەسەي پرەزيدەنتى ۆلاديمير پۋتين جانە تۇركيا باسشىسى رەجەپ تايىپ ەردوعان. فوتو: https://brodv

سىرتقى ىستەر جانە قاۋىپسىزدىك ساياساتى جونىندەگى جوعارى وكىلى جوزەپ بوررەل ءسۇريانىڭ يدليب ايماعىندا جالعاسىپ جاتقان شيەلەنىستى تەز ارادا توقتاتۋعا شاقىرادى.

ەۋرووداق وكىلى Twitter پاراقشاسىندا: «يدليبتە بولىپ جاتقان شيەلەنىستى دەرەۋ توقتاتۋ كەرەك. ۇلكەن اشىق حالىقارالىق اسكەري قاقتىعىسقا ءتۇسۋ قاۋپى بار. بۇل سونداي-اق، سالدارى اۋىر قايعى-قاسىرەت تۋدىرادى جانە قاراپايىم تۇرعىندارعا قاۋىپ توندىرەدى. ەو بارلىق تاراپتى جىلدام ەسكالاتسياعا شاقىرادى. ەو قاۋىپسىزدىك مۇددەلەرىن قورعاۋ ءۇشىن بارلىق قاجەتتى شارالاردى قاراستىرادى. ءبىز بارلىق مۇددەلى قاتىسۋشىلارمەن بايلانىستامىز»، – دەپ جازدى.

سوڭعى كەزدەرى يدليبتەگى احۋال كۇردەلەنىپ بارادى. وسى اپتادا ءسۇريانىڭ يدليب پروۆينتسياسىندا اۋە سوققىسى سالدارىنان 33 تۇرىك ساربازى مەرت بولعان. مالىمەتتەر بويىنشا، ساربازدار ءسۇريا ۇكىمەت كۇشتەرىنىڭ اۋە سوققىسى سالدارىنان كوز جۇمعان. دەگەنمەن جاعدايعا قاتىستى رەسمي داماسك بيلىگى قانداي دا ءبىر اقپارات تارقاتقان جوق. سوڭعى اقپار بويىنشا، تۇرىك بيلىگى قارسى سوققىعا كوشكەن.

وقيعادان كەيىن تۇركيا پرەزيدەنتى رەجەپ تايىپ ەردوعان قورعانىس مينيسترلىگىنىڭ باسشىلارى، سىرتقى ىستەر ءمينيسترى مەن قارۋلى كۇشتەرى باس شتابىنىڭ وكىلدەرىمەن شۇعىل كەڭەس وتىرىسىن وتكىزدى. تۇركيانىڭ سىرتقى ىستەر ءمينيسترى مەۆلۋت چاۆۋشوعلۇمەن سويلەسكەن ناتو باس حاتشىسى يەنس ستولتەنبەرگ «ءبىز رەسەيدىڭ ءسۇريا اسكەرىنە قولداۋ كورسەتىپ وتىرانىن جاقسى بىلەمىز جانە كرەملدىڭ بۇل قادامىن قولدامايمىز. الداعى ۋاقىتتا جاعداي ۋشىعىپ كەتپەس ءۇشىن رەسەي شەگىنۋى ءتيىس. ناتو تۇركياعا قولداۋ بىلدىرەدى»، – دەدى. اقش پەن ناتو تۇركياعا رەسەيلىك س-400 زىمىراندارىنان باس تارتۋ تۋرالى ۇسىنىس ءبىلدىردى. قازىرگى ۋاقىتتا ايماقتاعى جاعداي مەن تۇركيا-رەسەي بايلانىسى ءجىتى باقىلاۋدا.

"The Qazaq Times"