قازاقستان بىرقاتار ەلمەن اۋە قاتىناسىن شەكتەيدى

قازاقستان كوروناۆيرۋس دەرتى تاراعان بىرقاتار ەلمەن اۋە قاتىناسىن شەكتەيدى. بۇل تۋرالى يندۋستريا جانە ينفراقۇرىلىمدىق دامۋ مينيسترلىگى حابارلادى.

رەسمي وكىل: «قازىر ءبىرىنشى ساناتقا جاتاتىن مەملەكەتتەرگە رەيستەردى شەكتەۋ مۇمكىندىگى قاراستىرىلىپ جاتىر. بۇل وڭتۇستىك كورەيا، وڭتۇستىك-شىعىس ازيا ەلدەرى. تولىق ءتىزىمدى دەنساۋلىق ساقتاۋ مينيسترلىگى بەكىتەدى»، – دەدى. وڭتۇستىك كورەيادا بارلىق ءىرى پروۆينتسيالار مەن قالالار ينفەكتسيا جۇقتىرعان ادامداردىڭ بار ەكەنى تۋرالى حابار بەردى. وڭتۇستىك كورەيا استاناسى سەۋلدە تاعى ءتورت ادام ۆيرۋس جۇقتىرعان. ەلدە اتالعان دەرتتەن 11 ادام قايتىس بولدى، 1146 ادام ۆيرۋس جۇقتىرعان.

تىزىمگە يران دا ەنگىزىلۋى مۇمكىن. سەبەبى يراندا جاڭا ءتيپتى كوروناۆيرۋستى 43 ادامنىڭ جۇقتىرعانى انىقتالسا، قاتەرلى ۆيرۋس سالدارىنان قازا تاپقانداردىڭ سانى سەگىزگە جەتتى. رەسمي مالىمەتتەر بويىنشا، يران قىتايدان كەيىن كوروناۆيرۋس دەرتىنەن ەڭ كوپ جاپا شەككەن ەل قاتارىنا ەنگەن. وسى اپتادا تۇركيا مەن تاجىكستان يرانمەن اراداعى شەكارانى جاۋىپ، اۋە قاتىناسىن توقتاتتى.

بۇعان دەيىن قازاقستاننىڭ باس سانيتار دارىگەرىنىڭ قاۋلىسى شىققان بولاتىن. وعان سايكەس، ءبىرىنشى ساناتقا ناۋقاستار سانى ون ادامنان اساتىن مەملەكەتتەر جاتقىزىلدى.

قازىرگى ۋاقىتتا قىتايدان تىس جەردە ەڭ كوپ ناۋقاس تىركەلگەن ەلدەر: وڭتۇستىك كورەيا – 1146, جاپونيا – 851 (ولاردىڭ 691-ءى – Diamond Princess كرۋيزدىك لاينەرىنىڭ جولاۋشىلارى مەن ەكيپاج مۇشەلەرى), يتاليا – 229, سينگاپۋر – 90, يران – 61, اقش – 53, تايلاند – 35, اۆستراليا جانە مالايزيا – 22 ادامنان بار.

"The Qazaq Times"