الاڭدى پوليتسيا قورشاعان.

قازىر الماتى قالاسىنداعى "استانا" الاڭىنىڭ ماڭىندا ءالى تىركەلىپ ۇلگىرمەگەن دەموكراتيالىق پارتيا وكىلدەرى نارازىلىق شاراسىن وتكىزۋدە. ولار جەتەكشىلەرى، ساياساتكەر جانبولات مامايدىڭ بوساتىلۋىن، بيلىكتىڭ حالىق سوزىنە قۇلاق اسۋىن تالاپ ەتۋدە. 

دەموكراتيالىق پارتيا قۇرۋشىلار بۇگىن، ياعني 22 اقپاندا پارتيانىڭ العاشقى سەزد وتكىزۋدى جوسپارلاعان. الايدا، وڭىرلەردەگى پارتيا مۇشەلەرىنىڭ، بەلسەندىلەرىنىڭ ۇستالىپ جاتقانىن العا تارتىپ، سەزد وتكىزۋدەن باس تارتتى جانە ونىڭ ورنىنا بەيبىت شەرۋ وتكىزەتىندەرىن جاريالاعان ەدى. ال كەشە كەشتەن باستاپ اتالعان پارتيا جەتەكشىسى جانبولات مامايدان تارتىپ، بىرقاتار بەلسەندىلەردى ۇستاعان. بۇگىن تاڭەرتەڭ دەموكراتيالىق پارتيانىڭ 70-تەن استام بەلسەندىسىن ۇستاعانى تۋرالى اقپاراتتار تارالۋدا.

ء"اليا-مانشۇك" پاركىندە دەموكراتيالىق پارتيا جاقتاستارى جينالعان. الايدا، سول ماڭعا جەتكەن شەرۋشىلەردەن كورى پوليتسيا جاساقتارى، كۇشتىك قۇرىلىم وكىلدەرى جانە الماتى قالاسى اكىمدىگىنىڭ وكىلدەرىنىڭ سانى كوبىرەك. نارازى توپ "توقاەۆقا سەنىپ ەدىك، كەشەگى بەرگەن ۋادەسى قايدا، ساياسي وزگەرىس بولاتىنى قايدا؟" دەگەن سەكىلدى تالاپتارىن قويۋدا.

پارتيا جەتەكشىلەرىنىڭ ءبىرى ت. جۇكەەۆ بولسا بۇرىنعى پرەزيدەنت نازارباەۆتىڭ ءالدى دە بيلىكتى قولىنا ۇستاپ، قازىرگى پرەزيدەنتكە تولىق قۇقىق بەرمەي وتىرعانىن ايتۋدا. ونىڭ ايتۋىنشا، بۇنداي داعدارىسقا باستايىن بيلىكتىڭ كۇنى كوپ ۇزاققا بارمايدى.

تىلشىلەرىمىزدىڭ سوڭعى مالىمەتتەرىنە قاراعاندا، تالاپتارىن ايتىپ بولعاننان كەيىن دەمپارتيا وكىلدەرى تولەبي كوشەسىمەن باتىس باعىتتا ەرەۋىلدەپ جۇرمەك بولعان. الايدا، پوليتسيا قىزمەتكەرلەرى ولاردى ءبىر-بىرلەپ ارناي كولىكتەرگە باسىپ الىپ كەتتى.  سوڭىندا، جانبولات مامايدىڭ جۇبايى ينگا يمانبايدى دا اۋىر اياق ەكەنىنە قاراماستان پوليتسيا كولىگىنە وتىرعىزىپ الىپ كەتكەن.

قۇرمەتتى وقىرمان، الاڭداعى تىلشىلەرىمىزدىڭ جەتكىزگەن اقپاراتتارى بويىنشا بۇل حابار الدا دا تولىقتىرىلادى.

“The Qazaq Times”