قوردايداعى جاعدايدى قالپىنا كەلتىرۋ جۇمىسى ءجۇرىپ جاتىر. فوتو: اشىق دەرەككوز

«قورداي اۋدانىندا بولعان وقيعادان شامامەن 1,7 ملرد شىعىن كەلگەن» دەپ حابارلادى حابار 24 تەلەارناسى. اگەنتتىكتىڭ مالىمەتىنشە, بۇل سوما تۇپكىلىكتى انىق كورسەتكىش ەمەس. ازىرگە انىقتالعان جوباسى، الداعى ۋاقىتتا ءالى دە ءوسۋى مۇمكىن.

قۇجاتتارى تالاپقا ساي بولماسا وتەماقى تولىق بەرىلمەيدى. قازىر توتەنشە جاعداي كەزىندە زارداپ شەككەن ازاماتتارمەن جۇمىس ىستەۋ ماقساتىندا ارنايى توپتار قۇرىلعان. وقيعا بولعان ماسانشى، سورتوبە، بۇلار باتىر ەلدى مەكەندەرىندە جىلجىمالى حالىققا قىزمەت كورسەتۋ ورتالىعى جۇمىس ىستەپ تۇر. ماماندار جۇرتتىڭ ءوتىنىشىن تىركەپ، وسى جەردە قابىلدايدى. سونداي-اق 6 اۋىلدا ارنايى باقىلاۋ پوستى مەن 2 مىڭعا تارتا اسكەري جاعدايدى قاداعالاپ تۇر.

ازاماتتىق قوعام وكىلدەرى مەن ساراپشىلار كومپەنساتسيانىڭ ءادىل ءارى اشىق بولۋىن سۇرايدى. باعالاۋ جۇمىسىنا جاۋاپتى ساراپشىلارعا جۇكتەلەتىن باستى تالاپ – بۇلىنگەن نەمەسە قاقتىعىستان كەيىن جارامسىز بولىپ قالعان ارقانداي مۇلىكتىڭ وتەمى قۇجات جۇزىندە راستالۋى ءتيىس. ياعني مەملەكەت قازىناسىنىڭ قارجىسى وڭدى-سولدى ورتا تۇستان بازبىرەۋگە وڭايلىقپەن قانجىعاسىن مايلاپ الۋىنا جول بەرىلمەۋى كەرەك.

ءىىم دەرەگىندە ايماقتاعى قاقتىعىستان 30-دان استام تۇرعىن ءۇي، 15 ساۋدا دۇكەنى، 23 اۆتوكولىك ورتەنگەنى ايتىلعان ەدى. ەلۋگە جۋىق جىلجىمايتىن مۇلىك پەن 20-دان استام كولىكتىڭ جالپى شىعىنى 1,7 ملرد تەڭگەگە شىققان. ال بۇعان دەيىن ارىستا بولعان جويقىن جارىلىستا 8635 عيماراتتىڭ 7198-ءى بۇلىنگەن بولاتىن، ونىڭ 62-ءسى الەۋمەتتىك نىسان. سنارياد جاۋعان قالانى قالپىنا كەلتىرۋگە بيلىك جالپى جيىنى 56,1 ملرد تەڭگە: ۇكىمەت قورىنان – 27,5 ملرد تەڭگە، جەرگىلىكتى بيۋدجەتتەن – 20 ملرد تەڭگە، «سامۇرىق-قازىنا» قورىنان – 6 ملرد تەڭگە بولگەن. بۇدان بولەك، دەمەۋشىلەر مەن قايىرىمدىلىق كومەكتەن 2,6 ملرد تەڭگە جينالعان.

“The Qazaq Times”