الماتىدا «Almaty Invest» حالىقارالىق ينۆەستيتسيالىق فورۋمى باستالدى. بيىل فورۋمعا 20 مەملەكەتتەن 700-گە جۋىق دەلەگات شاقىرىلعان.

قازاقستاننىڭ وڭتۇستىك استاناسىنىڭ ينۆەستيتسيالىق تارتىمدىلىعىن ارتتىرۋ تاقىرىبىن ورتاعا سالعان شارادا الماتىداعى ستارتاپتار مەن يننوۆاتسيالاردىڭ بولاشاق ءوسۋ سەكتورلارى جونىندە پىكىرتالاستار ءوتتى. الماتىنىڭ ينۆەستيتسيالىق الەۋەتى جانە ىنتىماقتاستىق ءۇشىن جاڭا مۇمكىندىكتەر، ساندىق ەكونوميكانى دامىتۋ جانە بيزنەستى قولداۋدىڭ جاڭا نىساندارىن ەنگىزۋ بويىنشا ەل الدىنا قويىلعان مىندەتتەر اياسىندا يننوۆاتسيالار مەن كاسىپكەرلىكتى دامىتۋ ءسوز بولدى.

فورۋمدا 31 مەموراندۋمعا، $2,3 ميلليارد بولاتىن بيزنەس-كەلىسىمشارتقا قول قويۋ جوسپارلانعان. شارا اياسىندا قالا اكىمى باقىتجان ساعىنتاەۆ Japan System Planning Co پرەزيدەنتى كۋمانو كاسۋيۋكيمەن، Mitsui&Co.Moscow ديرەكتورى مەگرۋو حيروسي جانە McKinsey جاھاندىق ينستيتۋتىنىڭ باسشىسى دجوناتان ۆوتتسەلمەن ەكىجاقتى كەزدەسۋ وتكىزدى. ساعىنتاەۆ مالىمدەمەسىندە فورۋم ماڭىزىنا توقتالىپ، الماتى سان-فرانتسيسكو قالاسىنىڭ ۇلگىسىندە دامىپ كەلە جاتقاندىعىن اتاپ ءوتتى. سونىمەن قاتار، فورۋم سەسسيالارى اياسىندا الماتىنىڭ جاڭا حالىقارالىق تۋريزم رەتىندە قالىپتاسۋ جولدارى تالقىلاندى.

Almaty Invest Forum 2019 قوناقتارىنىڭ قاتارىندا تۇركيانىڭ بۇرىنعى ۆيتسە-پرەمەرى مەحمەت شيمشەك، McKinsey جاھاندىق ينستيتۋتىنىڭ باسشىسى دجوناتان ۆوتتسەل، تىە Globalo قاۋىمداستىعىنىڭ پرەزيدەنتى شارما ماحاۆير پراتار، ورتالىق جانە شىعىس ەۋروپا، ورتالىق ازيا ەلدەرى بويىنشا Nokia ۆيتسە-پرەزيدەنتى ميككو لاۆانتي، كاتار ساۋدا-ونەركاسىپ پالاتاسىنىڭ ۆيتسە-پرەزيدەنتى موحامماد بين تاۋار ال-كاۆاري جانە وتاندىق كومپانيالاردىڭ توپ-مەنەدجەرلەرى بار.

فورۋم ۇيىمداستىرۋشىلارى: «بيزنەستى دامىتۋدى ىنتالاندىرۋ، الماتىعا شەتەلدىك ينۆەستورلاردى تارتۋ جانە جاڭا جۇمىس ورىندارىن اشۋ فورۋمنىڭ باستى ماقساتى سانالادى. الماتى شەتەلدەن كەلگەن ينۆەستورلار ءۇشىن ەڭ تارتىمدى وڭىرلەردىڭ ءبىرى بولعاندىقتان، قالانىڭ ساندىق جاعىنان دامۋى زور ماڭىزعا يە. Almayu Invest Forum – قالا كاسىپكەرلەرى مەن الەۋەتتى ينۆەستورلار اراسىندا ديالوگ ورناتۋعا، قىزىقتىراتىن ساۋالدار مەن العا قويىلعان مىندەتتەردى شەشۋ جولدارىن تالقىلاۋعا مۇمكىندىك بەرەتىن الاڭ»، – دەپ اتاپ ءوتتى.

"The Qazaq Times"