اكىم-كوميسسار: قىرعىزستانعا ءوتىپ كەتكەن ازاماتتاردىڭ ءبارى قايتا ورالدى

قورداي اۋدانىندا بولعان ۇلتارالىق داۋعا ۇلاسقان جاپپاي قاقتىعىستان باسساۋعالاپ قىرعىزستانعا قاراي ءوتىپ كەتكەن 8 مىڭعا تارتا ازامات ەلگە ورالدى.

بۇگىن، جاپپاي تارتىپسىزدىكتەن كەيىنگى ءتورتىنشى كۇنى، ياعني 11 اقپان استاناداعى ۇكىمەت وتىرىسى كەزىندە ءسوز العان جامبىل وبلىسىنىڭ سۋ جاڭا اكىمى بەردىبەك ساپارباەۆ «قايتارىلعان قازاقستاندىقتار» تۋرالى حابارلادى ءارى وڭىردەگى جاعدايعا «تۇراقتى، قالىپتى» دەگەن باعا بەردى.

– ەكى كۇننىڭ ىشىندە سەگىز مىڭعا جۋىق ازامات قايتارىلدى. كەشەدەن باستاپ مەكتەپ، بالاباقشانىڭ بارلىعى بۇرىنعىداي جۇمىس ىستەپ جاتىر. بارلىق ساۋدا دۇكەندەرى دە جۇمىسىن باستادى، – دەدى كوميسسيا توراعاسى بولىپ كەلىپ، ايماق اكىمى قىزمەتىنە تاعايىندالعان ساپارباەۆ.

بەسىنشى مارتە وبلىس اكىمى قىزمەتىنە كىرىسكەن شەندى «بەس كۇننىڭ ىشىندە دارىگەردىڭ كومەگىنە 141 ادام جۇگىنگەن، سونىڭ 19-ى – قۇقىق قىزمەتكەرلەرى. وكىنىشكە وراي، 10 ادام قايتىس بولدى. قۇربان بولعانداردىڭ بارلىعىنىڭ وتباسىنا جاردەم كورسەتىلىپ جاتىر» دەدى. ونىڭ سوزىنشە، بۇگىنگى تاڭدا قورداي اۋداندىق اۋرۋحاناسىندا 13 ادام، الماتى ەمحاناسىندا 25 كىسى جاتىر. قوردايعا الماتىدان بىلىكتى 10 دارىگەر شاقىرىلعان. سونداي-اق اكىم قىرعىزتاندا اتالعان جاعداي بويىنشا ەشكىم قالماعانىن باسا ايتتى.

قازىرگى تاڭدا وڭىردەگى شىعىن كولەمى ەسەپتەلىپ جاتىر، انىقتالىپ بولعان سوڭ زارداپ شەگۋشىلەرگە وتەماقى تولەۋ تۋرالى ۇكىمەتكە ۇسىنىس جولدانباق. جەرگىلىكتى بالا-باقشا، مەكتەپ جۇمىسىن قايتا باستاپتى.

سونىمەن قاتار ساپارباەۆ قاقتىعىسقا بايلانىستى «الەۋمەتتىك ساياسات ەشقانداي ءساتسىز بولعان جوق، بۇل قازاقستاندا عانا ەمەس، باسقا ەلدەردە دە بولاتىن جاعداي» دەپ جاۋاپ بەردى.

“The Qazaq Times”