بەرليندە گەرمانيا مەن قازاقستان سىرتقى ىستەر مينيسترلەرى كەزدەستى.

گەرمانيا سىرتقى ىستەر ءمينيسترى حايكو مااسپەن كەلىسسوز جۇرگىزگەن قازاقستان ءسىم مۇحتار تىلەۋبەردى: «قازاقستاندا دويچە بانك، كناۋف، مەترو سەكىلدى گەرمانيانىڭ الپاۋىت كومپانيالارى جۇمىس ىستەيدى. قازىر قازاقستان مەن گەرمانيا اراسىنداعى ىنتىماقتاستىق ساپا جاعىنان جاڭا دەڭگەيگە شىعىپ وتىر. جالپى قازاقستاننىڭ نەگىزگى باسىمدىقتارىنىڭ ءبىرى - ينۆەستورلارعا قولايلى جاعداي جاساۋ. تاۋەلسىزدىككە يە بولعاننان بەرى ەلىمىزگە 300 ملرد دوللاردان اسا ينۆەستيتسيا تارتتىق. بۇل باعىتتا جۇمىسىمىزدى جالعاستىرىپ كەلەمىز. ينۆەستورلارعا بارلىق كەزەڭدە قولداۋ كورسەتىپ جۇرگەنىمىزدى ايتقىم كەلەدى»، – دەدى.

مۇنىمەن قاتار، مۇحتار تىلەۋبەردى گەرمانيانىڭ ەكونوميكا جانە ەنەرگەتيكا مينيسترىمەن كەزدەسىپ، ينۆەستيتسيالار مەن ەلدەرىمىز اراسىنداعى ىنتىماقتاستىقتى نىعايتۋ ماسەلەلەرىن تالقىعا سالدى. تاراپتار كەلەسى جولى قازاقستاندا جۇزدەسۋگە كەلىستى. پەتەر التمايەر جازدا ەلىمىزدە وتەتىن دۇنيەجۇزىلىك ساۋدا ۇيىمىنىڭ مينيسترلىك كونفەرەتسياسىنا قاتىسپاق.

گەرمانياداعى لوگيستيكالىق كومپانيا وكىلدەرى: «قازاقستاندى جاقسى بىلەمىن. جىبەك جولىندا بۇرىننان ىستەپ كەلەمىز. بۇل ەۋروپا مەن ازيانى جالعايتىن ماڭىزدى جول. اپتا سايىن دۋيسبۋرگ تەڭىز ايلاعىنان 35 پويىز جىبەرىپ تۇرامىز. گەرمانيا مەن قىتاي اراسىندا كوپتەگەن ەلدەر ورنالاسقانىن ۇمىتپاۋىمىز كەرەك. قازاقستاننىڭ كولىك تاسىمالى مەن لوگيستيكا سالاسىندا الەۋەتى زور، ءبىز قاتىسا الاتىن كوپتەگەن جوبالارى بار. بەرليندەگى كەلىسسوزدەرىمىز جاقسى ءوتتى. ينفراقۇرىلىم، كولىك پەن لوگيستيكا سالاسىندا مەنىڭ ناقتى جوبالارىم بار»، – دەيدى.

گەرمانيا قازاقستاننىڭ ەڭ ءىرى ءۇش ساۋدا ارىپتەسىنىڭ قاتارىنا كىرەدى. 2017 جىلى شىلدەدە قازاقستان مەن گەرمانيا ىسكەرلىك كەڭەسىنىڭ وتىرىسىندا قۇنى 872 ملن ەۋروعا باعالاناتىن 21 كەلىسىمگە قول قويىلدى. ال بيىل 25 ناۋرىزدا گەرمانيا قارۋلى كۇشتەرىنىڭ اسكەري قيمىلداردى مودەلدەۋ جانە اسكەري مەديتسينا سالاسىندا تسيفرلىق مونيتورينگ جۇيەسىن پايدالانۋدى ۇيرەنۋ ماقساتىندا ارنايى جاساق بولىمشەلەرى اراسىندا تاجىريبە الماسۋ تۋرالى كەلىسىمدەرگە قول قويىلدى. بىلتىر ەكى ەل اراسىندا اسكەري ىنتىماقتاستىق كەلىسىمى قابىلداندى.

"The Qazaq Times"