پرەزيدەنت توقاەۆتىڭ گەرمانياداعى ءىسساپارى باستالدى

پرەزيدەنت قاسىم-جومارت توقاەۆتىڭ گەرمانياداعى رەسمي ءىسساپارى باستالدى.

قازاقستان دەلەگاتسياسىنىڭ ساپارى ەكى كۇنگە جوسپارلانعان. ەڭ ماڭىزدى كەلىسسوزدەر گەرمانيا كانتسلەرى انگەلا مەركەلمەن جانە پرەزيدەنتى فرانك ۆالتەر شتاينمايەرمەن وتەدى. سونداي-اق بيزنەس قاۋىمداستىقپەن كەڭ اۋقىمدى كەزدەسۋ ۇيىمداستىرىلىپ، بەرلين ەۋرازيالىق كلۋبىنىڭ 28-وتىرىسى وتەدى.

مەملەكەت باسشىسى سوزىندە: «مەن ءوزىمنىڭ سايلاۋالدى باعدارلامام مەن حالىققا ارناعان جولداۋىمدا قوعامدى ساياسي جاڭعىرتۋ جونىندە ايتتىم. وسى سالادا جاڭا رەفورمالاردى قولعا الماساق، ەكونوميكانى ودان ءارى دامىتۋ مۇمكىن ەمەس. مۇنى ءتۇسىنۋ ءۇشىن ماركستىڭ ەڭبەكتەرىن وقىپ شىعۋ كەرەك. ەكونوميكا مەن ساياسات ءبىر-بىرىمەن تىعىز بايلانىستى»، – دەپ اتاپ ءوتتى.

حاتتاما تالاپتارىنا ساي سالتاناتتى قابىلداۋ، ىسكەرلىك تۇسكى اس جانە باسپاسوزگە ارنالعان مالىمدەمە دە قاراستىرىلعان. كەلىسسوزدەر ەكى ەل اراسىنداعى ستراتەگيالىق سەرىكتەستىكتىڭ جاڭا باعىت-باعدارىن ايقىنداۋعا ارنالادى. ءارى قۇنى 2 ميلليارد اقش دوللارى بولاتىن قۇجاتتارعا قول قويىلماق.

گەرمانيا قازاقستاننىڭ ەڭ ءىرى ءۇش ساۋدا ارىپتەسىنىڭ قاتارىنا كىرەدى. 2017 جىلى شىلدەدە قازاقستان مەن گەرمانيا ىسكەرلىك كەڭەسىنىڭ وتىرىسىندا قۇنى 872 ملن ەۋروعا باعالاناتىن 21 كەلىسىمگە قول قويىلدى. ال بيىل 25 ناۋرىزدا گەرمانيا قارۋلى كۇشتەرىنىڭ اسكەري قيمىلداردى مودەلدەۋ جانە اسكەري مەديتسينا سالاسىندا تسيفرلىق مونيتورينگ جۇيەسىن پايدالانۋدى ۇيرەنۋ ماقساتىندا ارنايى جاساق بولىمشەلەرى اراسىندا تاجىريبە الماسۋ تۋرالى كەلىسىمدەرگە قول قويىلدى. بۇگىنگە دەيىن گەرمانيا قازاقستان ەكونوميكاسىنا شامامەن 8,5 ميلليارد دوللار قۇيعان.

ايتا كەتەيىك، پرەزيدەنتتىك لاۋازىمىنا كىرىسكەلى ق.توقاەۆ اق ءۇي باسشىسى دونالد ترامپ، شۆەيتساريا پرەزيدەنتى ۋلي ماۋرەر، ۋكراينا پرەزيدەنتى ۆلاديمير زەلەنسكي، گرۋزيا پرەزيدەنتى سالومە زۋرابيشۆيلي سىندى ساياساتكەرلەرمەن كەزدەستى.

"The Qazaq Times"