پرەزيدەنت توقاەۆ گەرمانياعا كەتتى

قازاقستان پرەزيدەنتى قاسىم-جومارت توقاەۆ گەرمانيانىڭ ميۋنحەن قالاسىندا وتەتىن قاۋىپسىزدىك جونىندەگى فورۋمعا قاتىسادى.

جاھاندىق ءىرى فورۋم سانالاتىن قاۋىپسىزدىك جونىندەگى ميۋنحەن كونفەرەنتسياسىندا الەم ماسەلەلەرى تالقىلانىپ، جاڭا كەلىسسوزدەر جاسالادى. جيىنعا 40-قا جۋىق مەملەكەتتىڭ باسشىلارى، 100-دەن استام سىرتقى ىستەر جانە قورعانىس مينيسترلەرى، حالىقارالىق قاتىناستار سالاسىنداعى بەدەلدى ساراپشىلار قاتىپاق.

شاراعا دەيىن ەل پرەزيدەنت بىرنەشە مەملەكەتتىڭ باسشىلارىمەن، حالىقارالىق ۇيىمدار مەن گەرمانيانىڭ ءىرى كومپانيالارىنىڭ جەتەكشىلەرىمەن  ەكىجاقتى كەزدەسۋلەر وتكىزەدى دەپ جوسپارلانعان. اتاپ ايتقاندا، قاسىم-جومارت توقاەۆ «BayWaAG» كومپانياسىنىڭ باسقارما توراعاسى كلاۋس لۋتتسپەن كەزدەسپەك. اتالعان كومپانيا اۋىلشارۋاشىلىعى، قۇرىلىس جانە ەنەرگەتيكا سالاسىنىڭ الىبى سانالادى. ءىرى حولدينگ ەندى ورتالىق ازيامەن بايلانىس ورناتپاق.

ايتا كەتەيىك، گەرمانيا قازاقستاننىڭ ەڭ ءىرى ءۇش ساۋدا ارىپتەسىنىڭ قاتارىنا كىرەدى. 2017 جىلى شىلدەدە قازاقستان مەن گەرمانيا ىسكەرلىك كەڭەسىنىڭ وتىرىسىندا قۇنى 872 ملن ەۋروعا باعالاناتىن 21 كەلىسىمگە قول قويىلدى. ال بيىل 25 ناۋرىزدا گەرمانيا قارۋلى كۇشتەرىنىڭ اسكەري قيمىلداردى مودەلدەۋ جانە اسكەري مەديتسينا سالاسىندا تسيفرلىق مونيتورينگ جۇيەسىن پايدالانۋدى ۇيرەنۋ ماقساتىندا ارنايى جاساق بولىمشەلەرى اراسىندا تاجىريبە الماسۋ تۋرالى كەلىسىمدەرگە قول قويىلدى. بىلتىر ەكى ەل اراسىندا اسكەري ىنتىماقتاستىق كەلىسىمى قابىلداندى.

"The Qazaq Times"