كورنەكى سۋرەت

گونكونگتە ەرەۋىلدەر قايتا جانداندى. بۇل جولى نارازى توپ كوروناۆيرۋسقا شالدىققانداردى كارانتيندە ۇستايتىن عيماراتتى ورتەپ جىبەرگەن.

ءورت سوندىرۋشىلەر قىزىل جالىندى اۋىزدىقتاپ ۇلگەرگەن. وقيعا ورنىنا پوليتسيا قىزمەتكەرلەرى كەلىپ، ءبىر ادامدى تۇتقىنعا الدى. بۇعان دەيىن ەكى جۇزدەي ادام كوشەگە شىعىپ، ەرەۋىلدەر ۇيىمداستىرعان ەدى. نارازى حالىق بيلىكتىڭ بىرقاتار تۇرعىن ءۇي كەشەندەرىن كارانتيندىك ايماققا اينالدىرۋ شەشىمىنە قارسى شىققان. جەرگىلىكتى باق وكىلدەرىنىڭ حابارلاۋىنشا، ەرەۋىلشىلەر عيمارتتاردىڭ تومەنگى قاباتتارىن ورتەپ، جولدى جاۋىپ تاستاعان.

گونكونگتەگى جاپپاي نارازىلىق شەرۋلەرى ماۋسىمدا باستالعان. 16 ماۋسىمدا 2 ميلليونعا جۋىق ادام نارازىلىق شەرۋىنە شىققان ەدى. شاھارداعى نارازىلىق شارالارى باستاپقىدا گونكونگتىك ازاماتتاردى ەكستراديتسيالاۋ تۋرالى زاڭ جوباسىنا قارسىلىقتان باستالعانىمەن، سوڭعى كەزدەرى نارازى توپ گونكونگ قالاسىنىڭ دەربەستىگى تۋرالى دا ۇراندار كوتەرە باستادى. بۇل – ەل تاريحىندا بولماعان ماسسالىق نارازىلىق اكتسياسى. وسى سىندى اۋقىمدى نارازىلىق شەرۋى گونكونگتە 1997 جىلدان بەرى بولعان ەمەس. سول تۇستا بريتانيا ۇكىمەتى گونكونگتى قىتاي ۇكىمەتىنىڭ ايرىقشا باسقارۋ تارتىبىنە وتكەرىپ بەرگەن بولاتىن. بۇعان نارازى ءجۇز مىڭداعان ادام كوشەگە شىعىپ، قحر بيلىگىن قابىلداۋعا قارسى نارازىلىق بىلدىرگەن. گونكونگتا جەرگىلىكتى اكىمشىلىك باسشىسى كەرري لام زاڭ جوباسىن كۇن تارتىبىنەن الىپ تاستاۋ تۋرالى شەشىم قابىلدادى، بىراق بۇل ۇكىمەتكە قارسى نارازىلىق تولقىنىن توقتاتپادى. وسى رەتتە گونكونگ مەرى كەرري ليم: «بۇرىنعى اشىق، ەركىن، ەكونوميكالىق قۋاتتى، تۇراقتىلىق بار شاھاردان تۇك قالمادى ما دەپ قورقامىن. قايتا قالىپقا كەلۋ ءۇشىن ءبىراز ۋاقىت كەرەك. ەرەۋىلشىلەر اۋەجاي جۇمىسىن توقتاتىپ، مەترودا قاقتىعىسقا شىقتى، پوليتسيا ۋچاسكەلەرىنە دە شابۋىل جاساپ الاساپىران تۋعىزدى. ەرەۋىلشىلەر ءبىر مەزگىل ويلانىپ، جان-جاعىنا قاراسا ەكەن دەيمىن. ويلانباي جاساعان قادامدارى، قالاعا قانشالىقتى زيان كەلتىردى»، – دەپ مالىمدەدى.

25 قاراشادا گونكونگتىڭ 18 ايماعىندا وتكەن سايلاۋدا وپپوزيتسيا وكىلدەرى ايقىن جەڭىسكە جەتتى. دەموكراتيا ءۇشىن كۇرەس جۇرگىزگەن توپ ياعني وپپوزيتسيا وكىلدەرى 452 ورىننىڭ 396-ىنا يە بولعان (شامامەن 90%).

"The Qazaq Times"