اقش-تا ەرەۋىلدەردىڭ جاڭا تولقىنى بەلەڭ الۋدا. بەلسەندىلەر قارا ءناسىلدى رەيشارد برۋكستىڭ ولىمىنە قاتىستى تەرگەۋ ىسىنە كوڭىلدەرى تولمايدى.

12 ماۋسىمدا رەيشارد برۋكس اتلانتا قالاسىندا پوليتسيا قىزمەتكەرىنىڭ قولىنان قازا تاپقان. قارا ءناسىلدى ازامات پوليتسەيلەردىڭ ۇستاۋ كەزىندە العان جاراقاتىنان كوز جۇمدى. پوليتسياعا ءدامحانا وكىلدەرى قوڭىراۋ شالىپ، عيماراتقا كىرەتىن جولدى ءبىر كولىك بوگەپ تۇرعانىن جەتكىزەدى.  ءتارتىپ ساقشىلارى كەلگەندە كولىكتە ۇيىقتاپ قالعان ماس جۇرگىزۋشىنى كورەدى. الايدا 27 جاستاعى رەيشارد برۋكس پوليتسەيلەرگە بەرىلۋدىڭ ورنىنا قولىنا ەلەكتروشوكەر الىپ، قاشۋعا تىرىسقان. وقيعادان كەيىن افروامەريكاندىق ازاماتقا قارۋ قولدانعان وفيتسەر قىزمەتىنەن كەتتى. الايدا نارازى جۇرتتى بۇل شەشىم قاناعاتتاندىرماي وتىر. اشۋعا بوي بەرگەندەر شاھار كوشەلەرىنە شىعىپ برۋكس وتىرعان مەيرامحانانى ورتەپ، تارتىپسىزدىك ورناتقان.

بۇعان دەيىن افروامەريكالىق دجوردج فلويدتىڭ قازاسىنان كەيىن اقش-تا ءىرى ەرەۋىلدەر ورىن العان بولاتىن. 25 مامىردا ميننەاپوليس قالاسىندا 46 جاستاعى دجوردج فلويد پوليتسەي وكىلدەرىنىڭ كوز الدىندا جان تاپسىرعان. دۇكەن كاسسيرى مارقۇم جالعان بانكنوتپەن ەسەپ ايىرىسپاق بولدى دەگەن ۋاجبەن پوليتسيا شاقىرادى. ارتىنشا وقيعا ورنىنا كەلگەن ءتارتىپ ساقشىلارى كۇدىكتىنىڭ قولىنا كىسەن سالعاننان كەيىن وفيتسەرلەردىڭ ءبىرى ونىڭ جەلكەسىن اياعىمەن 7 مينۋتتاي باسىپ تۇرعان. داۋىسى قارلىققان افروامەريكالىق ءوزىنىڭ دەم الا الماي جاتقانىن ايتادى، بىراق وعان پوليتسەيلەر قۇلاق اسپاعان. وسىدان كەيىن «مەن تۇنشىعىپ قالدىم!» تىركەسى شەرۋدىڭ باستى ۇرانىنا اينالعان.

"The Qazaq Times"