قازاقستان سىرتقى ىستەر مينيسترلىگى فوتو: https://f.azh

قازاقستان سىرتقى ىستەر ءمينيسترى مۇحتار تىلەۋبەردى گونكونگتەگى جاعدايعا قاتىستى رەسمي مالىمدەمە جاساپ، قازاقستاندىق تۋريستەرگە ازىرشە اتالعان قالاعا بارماۋدى ۇسىندى.

م.تىلەۋبەردى سوزىندە: «گونكونگ ورتالىعىندا كولىكتەردىڭ ءجۇرۋى تىعىز بولىپ جاتىر. شەرۋ، پوليتسيامەن قاقتىعىس ۋنيۆەرسيتەت جاقتارىندا. جالپى، ءبىزدىڭ باس كونسۋلدىعىمىز ورنالاسقان جەر، باسقا اۋداندار تىنىش. قازاقستاندىق تۋريستەر نەگىزىنەن بارادى. بىراق قازىرگى جاعدايعا بايلانىستى ءسال كىدىرە تۇرسا دەگەن ۇسىنىس بار»، – دەدى.

گونكونگ قالاسى پوليتسياسىنىڭ قازاقستاندىق ديپلوماتتارعا ۇسىنعان اقپاراتىنا سايكەس، 18 قاراشادا نارازىلىق تانىتۋشىلارمەن قاقتىعىس بارىسىندا قازاقستان ازاماتى، گونكونگ باپتيست ۋنيۆەرسيتەتىنىڭ ءبىرىنشى كۋرس ستۋدەنتى نۇكپي ابىلقايىر ۇستالعان. كونسۋل ازاماتىمىزعا باردى، ونىڭ دەنساۋلىق جاي-كۇيى تۇراقتى، وڭ قولىنىڭ شىنتاعىندا ۇستاۋ كەزىندە قۇلاعات ساتتە العان ازداعان جاراقاتى بار.

وسىعان دەيىن قازاقستاننىڭ گونكونگتەگى باس كونسۋلدىعى گونكونگتەگى جاعدايدىڭ شيەلەنىسۋىنە جانە جاپپاي نارازىلىق اكتسيالارىنىڭ جالعاسۋىنا بايلانىستى ەلىمىزدىڭ ازاماتتارىنا قالادا قالىپتاسقان توتەنشە جاعدايدى ەسكەرۋدى وتىنگەن بولاتىن. سونىمەن قاتار، قر سىرتقى ىستەر مينيسترلىگىنىڭ رەسمي وكىلى ايبەك سمادياروۆ سول جاقتاعى قازاقستاندىق ستۋدەنتتەردى ەلگە ورالۋعا شاقىرعان.

ايتا كەتەيىك، گونكونگ شاھارىنداعى نارازىلىق شارالارى باستاپقىدا گونكونگتىك ازاماتتاردى ەكستراديتسيالاۋ تۋرالى زاڭ جوباسىنا قارسىلىقتان باستالعانىمەن، سوڭعى كەزدەرى نارازى توپ گونكونگ قالاسىنىڭ دەربەستىگى تۋرالى دا ۇراندار كوتەرە باستادى. 16 ماۋسىمدا 2 ميلليونعا جۋىق ادام نارازىلىق شەرۋىنە شىققان ەدى. بۇل ەل تاريحىندا بولماعان ماسسالىق نارازىلىق اكتسياسى ءالى كۇنگە دەيىن باسىلعان جوق.

"The Qazaq Times"