قازاقستان رەسەيدىڭ جاڭا پرەمەرىن شاقىردى

رەسەيدىڭ جاڭا پرەمەر-ءمينيسترى ميحايل ميشۋستين 31 قاڭتاردا وتەتىن «Digital Almaty: جاھاندىق ەكونوميكانىڭ تسيفرلىق بولاشاعى» حالىقارالىق فورۋمىنا كەلمەك.

تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىنىڭ ءباسپاسوز قىزمەتىنىڭ حابارلاۋىنشا، الماتىدا وتەتىن فورۋمعا ەۋرازيالىق ەكونوميكالىق وداققا مۇشە ەلدەر مەن ازەربايجان، وزبەكستان، مولدوۆانىڭ ۇكىمەت باسشىلارى كەلەدى. باستى تاقىرىپ – big data جانە جاساندى ينتەللەكت نەگىزىندە ءوڭىردىڭ تۇراقتى دامۋىن قامتاماسىز ەتۋ.

رەسمي حابارلامادا: «فورۋم اياسىندا قازاقستان، ارمەنيا، بەلارۋس، قىرعىزستان جانە رەسەي پرەمەرلەرىنىڭ قاتىسۋىمەن اۋقىمدى پلەنارلىق وتىرىس وتەدى. ساراپشىلار جاساندى ينتەللەكت، ءتيىستى ينفراقۇرىلىم جاساۋ، تەحنولوگيالاردى دامىتۋ ماسەلەسىن تالقىلايدى»، – دەلىنگەن.

وسى اپتادا ءپۋتيننىڭ شەشىمىمەن رەسەي ۇكىمەتى وتستاۆكاعا كەتتى. 15 قاڭتاردا وستاۆكاعا كەتكەن پرەمەر دميتري مەدۆەدەۆ ءپۋتيننىڭ جارلىعىمەن قاۋىپسىزدىك كەڭەسى توراعاسىنىڭ ورىنباسارى بولىپ بەكىتىلدى. ال 16 قاڭتاردا رەسەي پرەزيدەنتى ۆلاديمير ءپۋتيننىڭ جارلىعىمەن ميحايل ميشۋستين پرەمەر-ءمينيسترى بولىپ تاعايىندالدى.

باتىس ساراپشىلارىنىڭ پىكىرىنشە، كونستيتۋتسياعا وزگەرىستەر ەنگىزىپ، ۇكىمەتتى وتستاۆكاعا كەتىرۋ ارقىلى پۋتين «قازاقستاندىق ستسەناريدى» تاڭداعان. فرانتسيالىق Le Monde باسىلىمى: «باستى دۇنيە – 67 جاستا بولسا دا بيلىكتى باسقارىپ وتىرعان ءپۋتيننىڭ ساياسي جۇيەسى. مەملەكەتتىك كەڭەس، باسقا دا ورگانداردىڭ كۇشەيۋى ءالى كۇنگە دەيىن كۇماندى. بۇل جايت 2019 جىلى پرەزيدەنت قىزمەتىنەن كەتكەن، بىراق ۇلتتىق قاۋىپسىزدىك كەڭەسىنىڭ باسشىسى رەتىندە ساياسي ساحنادا باستى ءرولىن ساقتاپ كەلە جاتقان قازاقستاننىڭ بۇرىنعى باسشىسى ن.نازارباەۆتىڭ جوسپارىن ەسكە سالادى»، – دەپ جازعان.

"The Qazaq Times"