Resey prezidenti Vladimir Putin jäne prem'er-ministri Mihail Mişustin. Foto: aşıq derekköz

Reseydiñ jaña prem'er-ministri Mihail Mişustin 31 qañtarda ötetin «Digital Almaty: jahandıq ekonomikanıñ cifrlıq bolaşağı» halıqaralıq forumına kelmek.

Cifrlıq damu, innovaciyalar jäne aeroğarış önerkäsibi ministrliginiñ baspasöz qızmetiniñ habarlauınşa, Almatıda ötetin forumğa Euraziyalıq ekonomikalıq odaqqa müşe elder men Äzerbayjan, Özbekstan, Moldovanıñ ükimet basşıları keledi. Bastı taqırıp – big data jäne jasandı intellekt negizinde öñirdiñ twraqtı damuın qamtamasız etu.

Resmi habarlamada: «Forum ayasında Qazaqstan, Armeniya, Belarus', Qırğızstan jäne Resey prem'erleriniñ qatısuımen auqımdı plenarlıq otırıs ötedi. Sarapşılar jasandı intellekt, tiisti infraqwrılım jasau, tehnologiyalardı damıtu mäselesin talqılaydı», – delingen.

Osı aptada Putinniñ şeşimimen Resey ükimeti otstavkağa ketti. 15 qañtarda ostavkağa ketken prem'er Dmitriy Medvedev Putinniñ jarlığımen Qauipsizdik keñesi törağasınıñ orınbasarı bolıp bekitildi. Al 16 qañtarda Resey prezidenti Vladimir Putinniñ jarlığımen Mihail Mişustin pr'emer-ministri bolıp tağayındaldı.

Batıs sarapşılarınıñ pikirinşe, Konstituciyağa özgerister engizip, ükimetti otstavkağa ketiru arqılı Putin «qazaqstandıq scenariydi» tañdağan. Franciyalıq Le Monde basılımı: «Bastı dünie – 67 jasta bolsa da bilikti basqarıp otırğan Putinniñ sayasi jüyesi. Memlekettik Keñes, basqa da organdardıñ küşeyui äli künge deyin kümändi. Bwl jayt 2019 jılı prezident qızmetinen ketken, biraq Wlttıq Qauipsizdik Keñesiniñ basşısı retinde sayasi sahnada bastı rölin saqtap kele jatqan Qazaqstannıñ bwrınğı basşısı N.Nazarbaevtıñ josparın eske saladı», – dep jazğan.

"The Qazaq Times"