اقش-تىڭ مەملەكەتتىك حاتشىسى مايك پومپەو امەريكا مەن يران ماسەلەسىنە بايلانىستى قازاقستانعا ساپارىن كەيىنگە قالدىردى.

مەملەكەتتىك دەپارتامەنتتىڭ سايتىندا جاريالانعان حابارلامادا: «مايك پومپەو ۋكراينا، بەلارۋس، قازاقستان، وزبەكستان جانە كيپرعا جوسپارلاعان ساپارىن كەيىنگە قالدىرۋعا ءماجبۇر. ويتكەنى ول ۆاشينگتوندا بولۋى كەرەك، يراكتاعى جاعدايدى باقىلاپ، تاياۋ شىعىستاعى امەريكالىقتاردىڭ قاۋىپسىزدىگىن قامتاماسىز ەتۋ ءتيىس»،  – دەلىنگەن.

پومپەو قازاقستانعا قاڭتاردىڭ باسىندا كەلۋدى جوسپارلاعان ەدى. مەملەكەتتىك حاتشى رەسپۋبليكا پرەزيدەنتىمەن كەزدەسىپ، ساياسي، ەكونوميكالىق جانە مادەني-گۋمانيتارلىق ىنتىماقتاستىق ماسەلەلەرىن تالقىلاۋدى جوسپارلاعان.

31 جەلتوقساندا اقش-تىڭ باعداتتاعى ەلشىلىگى الدىندا نارازىلىق شاراسى بولىپ، شەرۋشىلەردىڭ الدى ەلشىلىك عيماراتىنا شابۋىلداعان. امەريكا بۇل نارازىلىقتىڭ ارتىندا يران تۇر دەپ ەسەپتەيدى. نارازىلىق اقش كۇشتەرىنىڭ يراكتاعى جانە سۇرياداعى شابۋىلىندا شيت مۇسىلماندارى قازا تاپقانى تۋرالى مالىمەت تاراعان سوڭ تۇتانعان ەدى. 8 قاڭتاردا يران اقش-تىڭ يراكتاعى بىرقاتار نىساندارىن زىمىرانمەن اتقىلادى.

"The Qazaq Times"