اقش قازاقستان بيلىگىنىڭ ساياساتى تۋرالى پىكىر ءبىلدىردى

اقش بيلىگى قازاقستاننىڭ سيريا مەن يراكتاعى ءوز ازاماتتارىن رەپاترياتسيالاۋ بويىنشا ساياساتىن جوعارى باعالايدى. بۇل تۋرالى مەملەكەتتىك دەپارتامەنتتىڭ تەرروريزمگە قارسى كۇرەس جونىندەگى ۇيلەستىرۋشىسىنىڭ مىندەتىن اتقارۋشى دجون گودفري مالىمدەدى.

تاياۋ شىعىستاعى ۆاشينگتون ينستيتۋتى ۇيىمداستىرعان بەينەكونفەرەنتسيادا دجون گودفري: «اقش كوپتەگەن ەلدەردى سيرياعا كەتكەن وتانداستارىن ەلگە قايتارۋعا شاقىردى. وسى ۋاقىتقا دەيىن ءبىز سيريا مەن يراكتان كامەلەتكە تولماعان 16 بالانى جانە 12 ەرەسەك ازاماتتاردى رەپاترياتسيالادىق. بۇل ەرەسەكتەردىڭ وننان بىرىنە فەدەرالدى قىلمىس جاسادى دەگەن ايىپ تاعىلدى»، – دەدى ول.

سونىمەن قاتار گودفري امەريكانىڭ بىرقاتار ەلدەرگە ءوز ازاماتتارىن قايتارۋعا كومەكتەسكەنىن جانە بۇل رەتتە قازاقستاننىڭ كوشباسشى مەملەكەت ەكەنىن ايتتى.

استانا كەلىسسوزى 2017 جىلى قاڭتاردا رەسەي پرەزيدەنتى ۆلاديمير ءپۋتيننىڭ ۇسىنىسى بويىنشا باستالعان. استاناداعى سيريا بەيبىت كەلىسسوزى جەنەۆاداعى بۇۇ باستاماسىمەن اشىلعان كەلىسسوزدەن بولەك وتەدى.

كەلىسسوز سيرياداعى ازامات سوعىسىن توقتاتۋدى كوزدەيدى. بۇعان دەيىن اقش ماسكەۋ مەن داماسكىنى استاناداعى كەلىسسوزدەن ناتيجە شىعارا الماي وتىر دەپ سىناعان. اقش مەملەكەتتىك دەپارتامەنتىنىڭ رەسمي وكىلى حيزەر نويەرت كەلىسسوزدى «فارس» دەپ اتاعان. ال قازاقستان سىرتقى ىستەر مينيسترلىگى استانا پروتسەسىن «ءتيىمدى» دەپ سانايدى.

2018 جىلى اقش مەملەكەتتىك دەپارتامەنتى 29 قاراشادا رەسەي مەن يران باشار اساد بيلىگىنىڭ بۇۇ قاۋىپسىزدىك كەڭەسىنىڭ قارارىندا ايتىلعان ساياسي پروتسەسكە قاتىسۋعا نيەتى جوقتىعىن استانا پروتسەسى ارقىلى جاسىرىپ-جاۋىپ وتىر دەپ مالىمدەگەن. مەملەكەتتىك دەپارتامەنت مالىمدەمەسىندە استاناداعى سوڭعى كەلىسسوزگە قاتىسۋشىلار سيريا كونستيتۋتسيالىق كوميتەتىنە كىرەتىن مۇشەلەر تىزىمىنە كەلىسە الماعانى، ياعني، سيريا داعدارىسىن ساياسي جولمەن رەتتەۋدە العا ىلگەرىلەمەگەنى ايتىلادى.

"The Qazaq Times"