باعدادتاعى جاعدايدان كەيىن يراندا ءجۇز مىڭنان استام ادام نارازىلىققا شىقتى. فوتو: https://theins.ru

اقش پەن يران بايلانىسى ۋشىعا ءتۇستى. سول سەبەپتى گەرمانيا، ۇلىبريتانيا سىندى بىرقاتار ەۋروپا ەلدەرى تاياۋ شىعىستاعى جاعدايدى رەتتەۋ ءۇشىن يرانمەن كەلىسسوز جۇرگىزۋگە نيەتتى. گەرمانيا سىرتقى ىستەر مينيسترلىگىنىڭ باسشىسى حايكو مااس وسىلاي دەپ مالىمدەدى.

وسى ماقساتتا مااس بۇۇ مەن ەۋرووداق شەڭبەرىندە بارلىق شارالار قولعا الىناتىنىن ايتتى. سونىمەن قاتار، گەرمانيا تاياۋ شىعىستا قارۋلى قاقتىعىستى بولدىرماۋعا كۇش سالاتىنىن جەتكىزدى.

بريتانيا سىرتقى ىستەر ءمينيسترى دومينيك راابتىڭ ايتۋىنشا، «اقش كاسەم سۋلەيمانيدى ءوز ازاماتتارىن قورعاۋ ءۇشىن ولتىرگەن. سەبەبى، ول ايماقتى تۇراقسىزداندىرىپ، باتىس ەلدەرىنىڭ وكىلدىكتەرىنە شابۋىلدار ۇيىمداستىرعان. بىراق رااب اسكەري قاقتىعىس ەلگە ەشقانداي پايدا اكەلمەيتىنىن، ودان تەك لاڭكەستىك توپتار ۇتادى». رااب سوزىندە: «ءبىز قازىر جاعدايدى تۇراقتاندىرۋعا كۇش سالىپ جاتىرمىز. ماسەلەنى ەۋروپالىق جانە امەريكالىق ارىپتەستەرىمىزبەن تالقىلادىق. كەشە يراك پرەزيدەنتىمەن، ال بۇگىن تاڭەرتەڭ وسى ەلدىڭ پرەمەر-مينيسترىمەن تەلەفون ارقىلى سويلەسىپ، ءوز ۇستانىمىمىزدى جەتكىزدىم. جۋىق ارادا يران سىرتقى ىستەر مينيسترىمەن دە قاقتىعىستى بولدىرماۋدىڭ جولدارىن تالقىلاماق ويدامىن»، – دەپ مالىمدەدى.

وتكەن اپتادا يراك جەرىنە اياق باسقان اقش اسكەريلەرى باعدادتاعى حالىقارالىق اۋەجايعا زىمىران اتقان. جارىلىس سالدارىنان يراننىڭ ارنايى جاساق گەنەرالى كاسەم سۋلەيماني قازا تاپقان. كەيىننەن گەنەرالدىڭ ولىمىنە قاتىستى جاۋاپكەرشىلىكيى پەنتاگون ءوز موينىنا الدى. قازىرگى ۋاقىتتا ەكى ەل اراسىنداعى جاعداي قايشىلىققا تولى. اق ءۇي باسشىسى ترامپ اقش كۇشتەرى يراننىڭ 52 نىسانىن بىردەن تالقاندايتىنىن جەتكىزدى. ال تەھران امەريكانىڭ تاياۋ شىعىستاعى 35 اسكەري بازاسىن نىساناعا الىپ، قارىمتا جاۋاپ قايتارۋعا دايىن ەكەنىن ايتىپ وتىر.

"The Qazaq Times"