كورنەكى سۋرەت. قازاقستان پرەزيدەنتى قاسىم-جومارت توقاەۆ جانە قىرعىزستان باسشىسى سوورونباي جەەنبەكوۆ. فوتو: http://kabar.kg

قازاقستان قىرعىزستاندى ەۋروپالىق وداقتىڭ «قارا تىزىمىنەن» شىعۋعا كومەكتەسپەك.

ەۋروپالىق وداقتىڭ قىرعىزستاندى «قارا تىزىمگە» ەنگىزگەنىنە 13 جىل بولدى. ەۋروپاداعى قاۋىپسىزدىك ستاندارتارىنا سايكەستەندىرۋ بويىنشا قويىلعان باستى تالاپتىڭ ءبىرى – ۇشقىشتار دايىندىعى بولاتىن. سول سەبەپتى قىرعىزستاننىڭ ۇشقىشتارى قاراعاندىداعى اۆياتسيالىق-جاتتىقتىرۋ ورتالىعىنان ءبىلىم جەتىلدىرمەك.

قىرعىز اۆياتسيالىق ينستيتۋتىنىڭ ديرەكتورى ۋلان كۋرمانوۆ: «شەتەلدەگى بىرنەشە وقۋ ورنىن قاراستىردىق. اتاپ ايتساق، تۇركيا، بالتىق ەلدەرى، رەسەي مەن قازاقستان اراسىندا تاڭداۋ جاسالدى. باعاسى مەن ساپاسى جانە ءبىزدىڭ جاعدايىمىزعا سايكەستىگى جاعىنان قازاقستانعا توقتالدىق. قاراگاندىدا مەملەكەتتىك تاپسىرىسپەن ۇشقىشتاردى دايىندايتىن وقۋ ورتالىعى بار. بىزدە ونداي مەملەكەتتىك تاپسىرىس جوق»،– دەيدى.

رەسمي مالىمەتتەر بويىنشا، سوڭعى 3 جىلدا قاراعاندىداعى اۆياتسيالىق-جاتتىقتىرۋ ورتالىعى قىرعىزستان ءۇشىن 19 ۇشقىشتى دايىنداپ شىعاردى. ولاردىڭ كوبى ءوز ەلىندە جۇمىس ىستەيدى. تورتەۋى رەسەيلىك اۋە كومپانيالاردان جۇمىس تاپقان. بيىل كۇزدە قىرعىزستان «قارا تىزىمنەن» شىعۋ باعدارلاماسىنىڭ 29 بابىن ورىنداعانى تۋرالى ەۋرووداققا ەسەپ بەردى. دەگەنمەن، ساراپشىلاردىڭ ايتۋىنشا، كەلەسى جىلى دا ەۋرووداق قىرعىزستاندى «قارا تىزىمنەن» شىعارمايدى. بۇل ءۇشىن كوپ ۋاقىت قاجەت.

اۆياتسيا ماسەلەسىن شەشۋ ماقساتىندا قىرعىزستان ۇكىمەتى بىلتىر «اشىق اسپان» ساياساتىن ەنگىزگەن. شەتەلدىك اۋە تاسىمالداۋشىلاردان ينۆەستيتسيا تارتقاننان كەيىن ەلدە جاڭا 4 اۋە رەيسى اشىلعان.

"The Qazaq Times"