Көрнекі сурет. Қазақстан президенті Қасым-Жомарт Тоқаев және Қырғызстан басшысы Сооронбай Жээнбеков. Фото: http://kabar.kg

Қазақстан Қырғызстанды Еуропалық одақтың «қара тізімінен» шығуға көмектеспек.

Еуропалық одақтың Қырғызстанды «қара тізімге» енгізгеніне 13 жыл болды. Еуропадағы қауіпсіздік стандартарына сәйкестендіру бойынша қойылған басты талаптың бірі – ұшқыштар дайындығы болатын. Сол себепті Қырғызстанның ұшқыштары Қарағандыдағы авиациялық-жаттықтыру орталығынан білім жетілдірмек.

Қырғыз авиациялық институтының директоры Улан Курманов: «Шетелдегі бірнеше оқу орнын қарастырдық. Атап айтсақ, Түркия, Балтық елдері, Ресей мен Қазақстан арасында таңдау жасаЛДЫ. Бағасы мен сапасы және біздің жағдайымызға сәйкестігі жағынан Қазақстанға тоқталдық. Қарагандыда мемлекеттік тапсырыспен ұшқыштарды дайындайтын оқу орталығы бар. Бізде ондай мемлекеттік тапсырыс жоқ»,– дейді.

Ресми мәліметтер бойынша, соңғы 3 жылда Қарағандыдағы авиациялық-жаттықтыру орталығы Қырғызстан үшін 19 ұшқышты дайындап шығарды. Олардың көбі өз елінде жұмыс істейді. Төртеуі ресейлік әуе компаниялардан жұмыс тапқан. Биыл күзде Қырғызстан «қара тізімнен» шығу бағдарламасының 29 бабын орындағаны туралы Еуроодаққа есеп берді. Дегенмен, сарапшылардың айтуынша, келесі жылы да Еуроодақ Қырғызстанды «қара тізімнен» шығармайды. Бұл үшін көп уақыт қажет.

Авиация мәселесін шешу мақсатында Қырғызстан үкіметі былтыр «ашық аспан» саясатын енгізген. Шетелдік әуе тасымалдаушылардан инвестиция тартқаннан кейін елде жаңа 4 әуе рейсі ашылған.

"The Qazaq Times"