قىرعىزستان مكە قازاقستان پرەزيدەنتتەرى. فوتو: ehonews.kz

قاسىم-جومارت توقاەۆ قىرعىزستان پرەزيدەنتى سادىر جاپاروۆپەن تەلەفون ارقىلى سويلەسىپ، قازاقستانعا رەسمي ءىسساپار بارىسىن تالقىلادى.

توقاەۆ جاپاروۆتى قىرعىزستان پرەزيدەنتى لاۋازىمىنا سايلانۋىمەن قۇتتىقتادى. تاراپتار دوستىققا، تاتۋ كورشىلىككە جانە ستراتەگيالىق ارىپتەستىككە قۇرىلعان قازاق-قىرعىز قاتىناستارىنىڭ بەرىكتىگىن ناقتىلاپ، ەكىجاقتى ىقپالداستىقتى جاڭا دەڭگەيگە كوتەرۋ ماقساتىندا بىرلەسۋگە دايىن ەكەنىن ايتتى. سونىمەن قاتار، قىرعىز پرەزيدەنتى وزىنە نازارباەۆتىڭ قۇتتىقتاۋ حات جىبەرگەنى ءۇشىن العىس ءبىلدىردى.

بۇعان دەيىن جاپاروۆ مەملەكەت باسشىسى رەتىندە العاشقى ساپارى قازاقستاننان باستالاتىنىن ايتقان. بىراق ءبىرىنشى كەزەكتە رەسەيگە باراتىنى بەلگىلى بولدى.

28 قاڭتاردا قىرعىزستاندا جاڭا پرەزيدەنتتىڭ يناۋگۋراتسياسى وتكەن بولاتىن. شاراعا قازاقستاننان قازىرگى ەمەس، بۇرىنعى پرەزيدەنت نۇرسۇلتان نازارباەۆ شاقىرىلعان. الايدا نازارباەۆتىڭ ءوزى شارادا بوي كورسەتپەدى. ونىڭ قۇتتىقتاۋ حاتىن ءراسىم كەزىندە قازاقستان حالىقتارى اسسامبلەياسى توراعاسىنىڭ ورىنباسارى جانسەيىت تۇيمەباەۆ وقىدى.

بىلتىر قازاننىڭ باسىندا قىرعىزستاندا پارلامەنتتىك سايلاۋ ناتيجەلەرىنە قارسى جاپپاي نارازىلىق اكتسيالارى باستالدى. 6 قازانعا قاراعان ءتۇنى جاپاروۆ جازاسىن وتەپ جاتقان شۋ وبلىسىنداعى كولونيادان ءوز جاقتاستارىمەن بوساتىلدى. سول كۇنى قىرعىزستاننىڭ جوعارعى سوتى ونىڭ ۇكىمىن جويدى.

14 قازاندا پارلامەنت دەپۋتاتتارى سادىر جاپاروۆتى قىرعىزستاننىڭ پرەمەر-ءمينيسترى ەتىپ بەكىتتى. پرەزيدەنت سوورونباي جەەنبەكوۆ ۇكىمەتتىڭ جاڭا قۇرامىن تاعايىنداۋ تۋرالى جارلىققا قول قويدى. كابينەتتىڭ بۇرىنعى باسشىسى كۋباتبەك بورونوۆ رەسپۋبليكاداعى ىشكى ساياسي جاعدايدىڭ ۋشىعۋىنا بايلانىستى ءوز ەركىمەن قىزمەتىنەن كەتتى.

15 قازاندا پرەزيدەنت سوورونباي جەەنبەكوۆ وپپوزيتسيانىڭ قىسىمىمەن وتستاۆكاعا كەتتى. كونستيتۋتسياعا سايكەس، جاڭا سايلاۋ وتكىزىلگەنگە دەيىن مەملەكەت باسشىسىنىڭ مىندەتتەرىن پارلامەنت سپيكەرى اتقارۋى ءتيىس ەدى. الايدا سپيكەر قاناتبەك يساەۆ پرەزيدەنتتىڭ وكىلەتتىگىن پرەمەر-مينيستر سادىر جاپاروۆقا بەردى.

"The Qazaq Times"