سادىقبەك ادامبەك، ساتيريك، جازۋشى.
  • ءبىزدىڭ ۇرپاق ادەبيەتكە دۇرلىگىپ كەلىپ، دۇرلىگىپ كەتكەندەي كورىنەدى. ال قازىرگى جاستار مۇلدە باسقاشا. ەلىكتەۋشىلىگى باسىم. وندا دا، اباي ايتقانداي، ورىس ادەبيەتىنەن، مادەنيەتىنەن ۇيرەنەيىك دەمەيدى، ورىس ادەبيەتىنىڭ سىرتقى فورماسىنا عانا ەلىكتەيدى. ءاربىر شىعارماشىلىقتا ىشكى مازمۇن، ۇلتتىق مىنەز بولاتىنىن ەسكەرمەيدى. ال ۇلتتىق مىنەزى جوق ولەڭ –ولەڭ ەمەس قوي. ول بۇگىن تۋادى، ەرتەڭ ولەدى. ۇزاك جاسامايدى. سوندىقتان، ادەبيەتكە كەلگەن ادام، ءاربىر شىعارماشىلىق يەسى الدىمەن ءوز ۇلتىنىڭ وكىلى بولۋى كەرەك. الدىمەن ۇلتتىق تاربيەسى مەن نامىسىن كورسەتە ءبىلۋى كەرەك. سوندا عانا ۇلتتىڭ ولەڭى تۋادى. قازىرگى ءبىزدىڭ قاقساپ جۇرگەنىمىز وسى!

ەڭ قاۋىپتىسى، بۇگىنگى قازاق عاسىرلار بويى قالىپتاسىپ كەلگەن سالت-ساناسىن، باتىرلىعى مەن ەرلىگىن جوعالتايىن دەپ وتىر. ءيا ءباسپاسوز بەن ادەبيەتتە ايتىلماسا، ءيا ۇيدە، ءيا مەكتەپتە ايتىلماسا، ۇلتىمىزدىڭ تاماشا بولمىس-بىتىمىمەن كەيىنگى ۇرپاق قالاي تانىس بولسىن؟ قالاي جالعاسسىن بۇل ءداستۇر... كادىمگى قول بۇلعاپ قوشتاسىپ كەتىپ بارا جاتقان قىز سياقتى... ىلگەرىدە، وتكەن عاسىردىن 60-شى جىلدارىندا، جازۋشىلار وداعىندا سوزدەن-ءسوز شىعىپ، عابەڭ: «ەگەر قازاق وسى كۇيىندە 40 جىل ءومىر سۇرسە، ءتىلىن، ءدىلىن ساقتاپ قالسا، ولمەيدى»، – دەگەن ەدى. وكىنىشكە قاراي، سول 40 جىل ىشىندە حالقىمىز شالاجانسار كۇيگە ۇشىرادى...

ساتيريك، جازۋشى سادىقبەك ادامبەكتىڭ باق-قا بەرگەن سۇحباتىنان.

“The Qazaq Times”