تۇراقتى دامۋ بويىنشا وتكەن حالىقارالىق فورۋم ساراپشىلارىنىڭ بولجامىنشا، 2060 جىلعا دەيىن شيكىزاتتى تۇتىنۋدىڭ الەمدىك مولشەرى ەكى ەسەگە ارتپاق.

فورۋمدا الەمنىڭ جەتەكشى ساراپشىلارى ءتۇرلى ەلدەردىڭ يندۋسترياسىنىڭ ەكولوگيالىق بولاشاققا ءوتۋ جولدارىن تالقىلادى. اتالعان جيىنعا قازاقستان اتىنان نەمىستىڭ فەدەرالدىق گيز كومپانياسى قولداعان دەلەگاتسيا قاتىسىپ، ەلىمىزدە جانە ودان تىس جەردە ءوندىرىس ورىندارى بار حالىقارالىق ونەركاسىپتىك توپتاردىڭ جۇمىس ىستەۋ شارتتارى مەن مىندەتتەمەلەرىن سالىستىرعان.

وسى تاقىرىپ اياسىندا ءسوز سويلەگەن قر ەكولوگيالىق ۇيىمدارى قاۋىمداستىعىنىڭ باسقارما توراعاسىنىڭ ورىنباسارى ەلدوس اباقانوۆ: «ەكولوگيالىق كودەكسكە قاتىستى داۋ كوپ بولدى. الايدا ول قازىر دايىندالىپ جاتىر. قۇجات ءىرى كاسىپورىنداردىڭ جۇمىسىن رەتتەۋگە باعىتتالعان جانە ول مەكەمەلەردى ەڭ ۇزدىك قولجەتىمدى تەحنولوگيالاردى ەندىرۋگە ىنتالاندىرادى. ءسويتىپ، بۇل كودەكستى جاڭعىرتۋ قۇرالى دەسەك تە بولادى. ول ەۋروپا ەلدەرىندە كەڭىنەن قولدانىلىپ كەلەدى»، — دەپ اتاپ ءوتتى.

قازاقستان پاريج كليماتتىق كەلىسىم بويىنشا مىندەتتەمەلەردى موينىنا العاندىقتان، تومەن كومىرتەكتىك وندىرىسكە كوشۋ ماڭىزدى ماسەلە قاتارىندا. ساراپشىلاردىڭ پىكىرىنشە، «جاسىل» وندىرىسكە ءوتۋ جاڭا مۇمكىندىكتەرمەن قاتار جاڭا تۇيتكىلدەر دە تۋدىرادى.

"The Qazaq Times"