فوتو: REUTERS

اقش-تىڭ 12 شتاتى حالىقتىڭ دەنساۋلىعى مەن قورشاعان ورتانى قورعاۋ تۋرالى جارلىققا قول قويعانى ءۇشىن پرەزيدەنت دجو بايدەن مەن ونىڭ اكىمشىلىگىن سوتقا بەرمەك. Fox News مالىمەتىنشە، تالاپكەرلەر فەدەرالدى رەتتەۋشىلەردىڭ وكىلەتتىكتەرىن كەڭەيتۋ ايتارلىقتاي ەكونوميكالىق زيان كەلتىرۋى مۇمكىن دەپ سانايدى.

ميسسۋري شتاتىنىڭ باس پروكۋرورى ەريك شميتت ۇسىنعان حاتقا اركانزاس، اريزونا، ينديانا، كانزاس، مونتانا، نەبراسكا، وگايو، وكلاحوما، وڭتۇستىك كارولينا، تەننەسسي جانە يۋتا شتاتتارىنداعى ارىپتەستەرى قول قويعان. تاراپتاردىڭ سوتقا شاعىمدانۋىنا كليماتتىق كەلىسىمگە بايلانىستى شەشىم سەبەپ بولعان.

بايدەن قىزمەتىنە كىرىسكەن پاريج كليماتتىق كەلىسىمىنە قايتا ورالۋ تۋرالى جارلىققا قول قويدى. ال بۇرىنعى پرەزيدەنت دونالد ترامپ 2017 جىلى پاريج كەلىسىمىن «اقش ەكونوميكاسى ءۇشىن قولايسىز كەلىسىم بولدى» دەپ اتاپ، ءوز ەلىن بۇل كەلىسىمنەن شىعاراتىنىن مالىمدەگەن. اقش رەسمي تۇردە بۇل كەلىسىمنەن 2020 جىلى قاراشا ايىندا شىقتى. ونىڭ قايتا قوسىلۋى ءۇشىن ءبىر اي ۋاقىت كەرەك بولادى.

سەناتور-رەسپۋبليكاشىل تەد كرۋز بايدەننىڭ پاريج كەلىسىمىنە ورالۋ باستاماسىن سىناپ، «بۇل شەشىم امەريكانى الەمدە كوشباسشى ەتپەيدى، كليمات ماسەلەسىن دە شەشپەيدى، سونىڭ سالدارىنان مىڭداعان امەريكالىق جۇمىسىنان ايىرىلادى» دەپ مالىمدەدى. ال سەناتور-رەسپۋبليكاشىل كەۆين كرامەر بايدەن شەشىمىن «اقىلعا قونىمدى قادام» دەپ اتاپ، تەك جاڭا اكىمشىلىك امەريكانىڭ ۇلتتىق مۇددەسىن ۇمىتپاي، امەريكالىق سالىق تولەۋشىلەردىڭ اقشاسىنىڭ ىسىراپ بولۋىنا جول بەرمەۋى ءتيىس دەدى.

"The Qazaq Times"