ترامپ ءباسپاسوز ماجىلىسىندە. فوتو: cnn.com.

قۇراما شتات پرەزيدەنتى دونالد ترامپ ءوزىنىڭ ەكى شەشىمىن وزگەرتتى. ول اقش پرەزيدەنتتىگىنە كەلگەننەن بەرى سولتۇستىك كورەيانىڭ ەڭ جوعارى باسشىسى كيم جوڭ ۋن (كيم چەن ىن/ Kim Jong Un) اراسىنداعى تەكە-تىرەس ەكى ەلدىڭ اراسىنداعى قارىم-قاتىناستى شيەلەنىستىرىپ كەلگەن ەدى. سونىمەن بىرگە ول بىرقاتار حالىقارالىق ماڭىزدى كەلىسىمدەردەن باس تارتۋعا شەشىم شىعارعان بولاتىن. سونىڭ بىرىندە عالامدىق كليماتتىڭ جىلىنۋىنا قارسى تۇرۋ ءۇشىن جاسالعان «پاريج كليمات كەلىسىمىنەن» باس تارتاتىنىن بىلدىرگەن.

دەگەنمەن، سوڭعى كۇندەرى ترامپ ءوزىنىڭ بۇل ەكى قادامىن كەرى قايتاردى. ول سولتۇستىك كورەيانى قارۋلى كۇشپەن جونگە سالۋ نيەتىنەن قايتىپ، ەگەر ۋاقىت پەن شارت-جاعدايدىڭ ۇيلەسىمى بولىپ جاتسا سولتۇستىك كورەيا جاقپەن كەلىسسوزگە قارسى ەمەس ەكەنىن اق ءۇي ءباسپاسوز قىزمەتىنىڭ جازباشا مالىمدەمەسى ايعاقتادى. ول جانە وڭتۇستىك كورەيا پرەزيدەنتى ءمۇن جاينمەن تەلەفوندا سويلەسىپ، اقش پەن سولتۇستىك كورەيا اراسىندا كەلىسسوزدى جانە وزگە دە ماڭىزدى ماسەلەلەردى تالقىلاعان. بۇل تۋرالى «People» باسىلىمى حابارلادى.

بۇعان قوسا اقش پرەزيدەنتى الەم حالقىنىڭ قارسىلىعىنا قالعان «پاريج كەلىسىمىنەن» شىعۋ تۋرالى شەشىمىن وزگەرتەتىنىن دە ءبىلدىردى. ول ءوزىنىڭ سوزىندە: «پاريج كەلىسىمى تۋرالى الىدە ويلانامىز. بۇل الەم تاعدىرىنا جانە كليماتتىڭ وزگەرىسىنە بايلانىستى وتە سەزىمتال ماسەلە»، – دەگەن.

پرەزيدەنت تاعىنا وتىرعان كەزدە ترامپ «پاريج كليمات كەلىسىمى» اقش-تىڭ ءوندىرىس قارقىنىن تەجەپ، كەلىسىمدە وزىنە ازىراق مىندەت جۇكتەگەن قىتاي مەن رەسەيدىڭ وندىرىسىنە كوبىرەك تيىمدىلىكتەر جاساپ بەرگەنىن العا تارتقان ەدى. بۇل جولى ترامپ: «ەگەر شارتتاردى قايتا قاراپ، تەڭ ءارى ءتيىمدى كەلىسىمدەر جاسالىپ جاتسا، قۇراما شتات كەلىسىمگە قايتا ورالادى» ، – دەدى.

“The Qazaq Times”